Монгол Улсын Их хурлын 2024 оны ээлжит сонгуулийн санал хураалт орон даяар эхэллээ. Энэ удаагийн сонгуулийн санал хураалт орон даяар эхлэхээс өмнө гадаад улсад амьдарч байгаа иргэдээс зургадугаар сарын 20-23-ны өдөр харьяа санал хүлээсэн авсан. Тэгвэл дэлхийн 43 орны 47 дипломат төлөөлөгчийн газарт сонгогчоор бүртгүүлсэн 13,905 сонгогчоос 9760 буюу 74 хувьтай саналаа өгчээ.

                                Тухайлбал, Кувейт Улсад оршин сууж буй иргэд 100 хувь саналаа өгсөн бол Бүгд Найрамдах Узбекистан Улс, Бүгд Найрамдах Ардчилсан Лаос Ард Улс, Бүгд Найрамдах Киргиз Улс, Арабын Нэгдсэн Эмират Улс, Бүгд Найрамдах Социалист Вьетнам Улс, Арабын Бүгд Найрамдах Египет Улс, Бүгд Найрамдах Беларусь Улс, Бүгд Найрамдах Энэтхэг Улс, Сингапур улсад оршин сууж буй иргэдийн ирц 90 гаруй хувьтай гарсан байна. Гадаадад ажиллаж, амьдарч байгаа иргэдийн саналыг салбар комиссууд тусгай дугтуйнд битүүмжлэн СЕХ-д хүргүүлээд байгаа. Улмаар гадаадад амьдарч байгаа иргэдийн саналыг өнөөдөр буюу зургадугаар сарын 28-ны 22:00 цагаас СЕХ-д дотоодын саналын хуудастай зэрэг тоолох юм.