“Үндэсний Эвсэл”-ийн тэргүүн Н.Номтойбаяр шууд дамжуулалтынхаа үеэр “Увс аймгийн боомтоор эрүүгийн онц ноцтой гэмт хэрэгтнүүд болох Тува иргэд олноор орж ирж байна” гэсэн билээ. Үүнтэй холбоотойгоор Хил хамгаалах ерөнхий газраас цаг үеийн асуудлаар мэдээлэл өгч байна.

             Хил хамгаалах ерөнхий газрын дарга, Хилийн цэргийн командлагч, бригадын генерал Х.Лхагвасүрэн  “Өнөөдрийн байдлаар Монгол Улсын хилд гарсан зөрчилгүй тайван байна. Хилийн шалган нэвтрүүлэх албан өвөрмөц онцлогтой, олон улсын 40 орчих гэрээ хэлэлцээр, Монгол Улсын хууль тогтоомжийн дагуу явдаг алба. Шалган нэвтрүүлэх албыг хөрш орнуудтайгаар нягт харилцан ажиллагаатайгаар хийдэг. Гэмт хэрэг үйлдсэн, олон улсад эрэн сурвалжлагдаж байгаа хүмүүсийн мэдээ мэдээллийг цаг тухайд нь солилцож, өөр улсын хил нэвтрүүлэхгүй байх тал дээр ажилладаг. Монгол Улсын Тагнуулын ерөнхий газар, ЦЕГ, Гаалийн ерөнхий газар болон Гадаадын иргэн харьяатын газартай хамтран ажилладаг. Улсын хилийн аюулгүй байдал бол их эмзэг сэдэв. Буруу ташаа мэдээлэл улс оронд болон олон улсад хор уршигтай. Шалган нэвтрүүлэх алба, хил хамгаалалт хэвийн зохион байгуулагдаж байна” гэв.