Өвөрхангай аймгийн Сант сумын Ардчилсан намын дарга Б-ийг тус тойрогт нэр дэвшиж байгаа Г.Сайханбаярын ухуулагч О зодож, амийг нь хөнөөсөн хэрэг гарсан. Тэгвэл Сант сумын Ардчилсан намын дарга Б-ийн амиа алдсан хэрэгтэй холбоотойгоор МБА-ны Тусгай субьектээс үйлдсэн гэмт хэрэг мөрдөн шалгах хэлтсийн дарга, цагдаагийн хурандаа Б.Баттулга сэтгүүлчдэд мэдээлэл өглөө.

                       Тэрбээр “Уг хэрэгтэй холбогдуулан Монгол Улсын Эрүүгийн хуульд тусгасны дагуу Өвөрхангай аймгийн иргэн О-г таслан сэргийлэх арга хэмжээ авсан. Иргэн О-г холбогдуулан шалгаж байгаа хэрэг нь хуульд заасны дагуу 15-20 жил эсвэл бүх насаар нь хорих ялтай байдаг. Одоогоор Сант сумын Ардчилсан намын дарга Б-ийн амиа алдсан хэрэгтэй холбоотойгоор гэрчийн мэдүүлэг аваагүй. Харин нэр дэвшигч Г.Сайханбаярын зүгээс тус хэрэгт өөрийг нь холбогдуулан шалгаж байгаа эсэхэд хариу тайлбар хүссэн. Цагдаагийн байгууллагын зүгээс нэр дэвшигчид “Гэмт хэргийн холбогдогч биш” гэх хариу тайлбар өгсөн. Уг хэргийн мөрдөн шалгах ажиллагааг үргэлжлүүлж байна” гэв.