“Үндэсний эвсэл”-ийн сонгуулийн төв штабын байранд цагдаагийн байгууллагаас хойшлуулшгүй ажиллагаа явуулж нэгжлэг хийсэн талаар бид мэдээлсэн. Тэгвэл уг асуудлаар цагдаагийн байгууллагаас албан ёсны тайлбар хийлээ.

                Энэ талаар ЦЕГ-ын хэвлэл мэдээлэл олон нийттэй харилцах хэлтсийн дарга Г.Пүрэвдэлгэр “Цагдаагийн байгуулагад энэ оны зургадугаар сарын 25-нд 12:25 цагт “Чингэлтэй дүүрэгт байрлах "Хөдөлмөрчдийн эвлэлийн ордон"-д гэмт хэргийн шинжтэй үйлдэл явж байж болзошгүй нөхцөл байдалтай байна” гэх дуудлага мэдээлэл ирсэн. Мөн өдрийн 13:23 цагт “Сэтгүүлчид байгууллагын хэвийн үйл ажиллагааг алдагдуулаад байна” гэх дуудлага мэдээлэл нэр бүхий иргэдээс ирсэн.

      Иргэдээс ирсэн гомдлын дагуу Чингэлтэй дүүргийн нэгдүгээр хэлтсийн алба хаагчид очиж, хойшлуулахгүй ажиллагаа явуулж байна. Шалгалтын явцад тухай байранд олон тооны компьютер, тоног төхөөрөмж суурилуулан, иргэдийг цуглуулан ажиллуулж байсан нь тогтоогдсон. Тухайн байранд ямар үйл ажиллагаа явуулж байсныг шалгаж байна. Шалгалтын ажил үргэлжилж байгаа учраас дэлгэрэнгүй мэдээлэл өгөх боломжгүй байна" гэлээ.