Нийслэлийн онцгой комисс цаг үеийн нөхцөл байдалтай холбоотойгоор мэдээлэл өгч байна. Энэ үеэр НОБГ-ын дарга, хурандаа А.Дашням мэдээлэл өглөө.

Тэрбээр “Хоёр хоног орсон борооны улмаас Туул голын үерийн түвшин 260 сантиметр байх ёстойгоос 342 сантиметр болж үерлэсэн. Улаанбаатар хотын хэмжээнд түүхэндээ ийм хэмжээнд хүрч байгаагүй. 1966 оны үерээс 310 сантиметр, өнгөрсөн жилийн үерээр 311 болж үерлэсэн. Өнөөдрийн байдлаар 70 сантиметрээр татарсан. ОБЕГ-д нийт 211 удаагийн дуудлага ирсэн. Үерийн үеэр хүн амиа алдаагүй. Улаанбаатар хотын хэмжээнд Нийслэлийн Засаг дарга энэ сарын 29-ны өдөр хүртэл өндөржүүлсэн бэлэн байдал зарласан. Мэргэжлийн байгууллага урьдчилан сэргийлэх журмаар ажиллаж байна. Өчигдөр ОБЕГ-т хоёр удаагийн золгүй дуудлага ирсэн. 13 настай хүүхэд СХД-т тогтоол усанд амиа алдсан мөн Сэлбэ гол 41 настай эрэгтэй амиа алдсан дуудлага ирсэн. Эцэг эхчүүдийг хүүхдүүддээ тавих хараа хяналтаа сайжруулж, анхааралтай байхыг хүсэж байна. Голын түвшин одоо ч үеийн түвшинд байгаа. Өнгөрсөн жилийн дөрвөн удаагийн  том үерт ажилласан учраас энэ жил Нийслэлээс хөрөнгө гаргаж бэлтгэл хангаж ажилласан. Мэргэжлийн байгууллагууд ажил үүргээ эртнээс зохион байгуулж ажилласны үр дүнд айхтар эрсдэл гарсангүй. Өмнөх алдаагаа алдахгүйгээр зохион байгуулна” гэв.