Ардын хувьсгалын 102 жилийн ойн үндэсний их баяр наадмын хүчит бөхийн барилдаанд Архангай аймгийн Цэнхэр сумын харьяат М.Бадарч түрүүлж, улсын арслан цол хүртсэн. Гэсэн ч шинжилгээгээр М.Бадарчаас допинг илэрч, улмаас спортын арбитраар шалгуулсны эцэст арбитрын шүүх түүнийг допинг хэрэглэсэн гэж үзэн цолыг нь хурааж, унасан бөхчүүдэд нь цол нөхөн олгохоор болсон. Тэгвэл өнөөдөр улсын баяр наадмын улсын цолны даваанд М.Бадарчид өвдөг шороодсон бөхчүүдэд цолыг нь нөхөн олгов. Энэ үеэр улсын заан цолоо нөхөр хүртсэн С.Сүхбат сэтгүүлчдэд мэдээлэл өглөө.

                              Тэрбээр “Монгол Улсын заан цолоо өнөөдөр авлаа. Сайхан байна. Би допингийн эсрэг хатуу байр суурьтай байдаг. Допинг хэрэглэж байгаа хүмүүс бусдын хөдөлмөрийг шударга бус, хууль бус аргаар мөлжиж байна гэж ойлгодог. Тиймээс цаашид холбогдох байгууллагууд допингийн эсрэг хууль, журмаа чангаруулаасай гэж боддог юм. Бөхчүүдээс явцын шинжилгээ бага авдаг нь үнэн. Явцын шинжилгээ бага байгаагаас хүмүүс их хэрэглэдэг. Тэгээд наадамд барилдаж, улсын цолонд хүрээд шинжилгээ өгөхөөрөө баригдчихдаг. Харин явцын шинжилгээ идэвхтэй авдаг болбол допингийн хэрэглээ ч багасах болов уу гэж бодож байна” гэв.