Өнгөрсөн жилийн баяр наадмаар М.Бадарчид өвдөг шороодсон нэр бүхий бөхчүүдэд улсын цол, чимгийг өнөөдөр нөхөн олголоо. Учир нь, М.Бадарчаас допинг илэрсэн хэмээн үзсэн учир өнгөрсөн жилийн наадамд тавын даваанд өвдөг шороодсон аймгийн арслан Б.Баянмөнхөд улсын начин, зургаагийн даваанд өвдөг шороодсон улсын начин Э.Дашид улсын харцага, долоогийн даваанд унасан улсын харцага С.Сүхбатад улсын заан, наймын даваанд унасан улсын аварга О.Хангайд чимэг нэмж, есийн даваанд унасан улсын гарди Ц.Бямба-Отгонд улсын арслан  цол нөхөн олгосон билээ. Тэгвэл зургаагийн даваанд М.Бадарчид өвдөг шороодсон Э.Даш өнөөдөр улсын харцага цолоо нөхөн аваад байгаа. 

    Тэрбээр Дундговь аймгийн Эрдэнэдалай суманд 1992 онд төрсөн. Түүний өвөөгийн ах нь цэргийн заан Цэвээндаш гэж хүн байжээ. Харин эцгийнх нь талд бөхийн удам байхгүй. 2008 оноос Д.Дэлгэрбат багшийн бөхийн секцэнд хичээллэж, бөх болох гараагаа эхлүүлж, Аварга Биеийн тамирийн дээд сургуульд сурч төгссөн. Тэрбээр Ардын хувьсгалын 102 жилийн ойн баяр наадмаар улсын начин Т.Дүгэрдоржоор дөрөв, улсын заан Б.Серикээр тав давж Өсөх идэр чимэг хүртсэн байдаг.