Монголоос Их Британийн Манчестер хот хүртэлх 20 улсаар дамжин 14 мянган километр зам туулсан дугуйчин Б.Очирваанийн тухай нэвтрүүлэг Английн хэвлэлүүдээр цацагдсан билээ. Тодруулбал, хөл бөмбөгийн Английн Премьер лигийн “Манчестер Юнайтед” клубийг дэмждэг монгол дугуйчин дэмждэг багийнхаа талбай, дуртай хөл бөмбөгчинтэйгөө уулзахаар Монголоос Манчестер хүртэл 20 улс дамжиж, 14 мянган километр зам туулах аялалдаа өнгөрсөн онд гарсан. Улмаар Б.Очирваань өнгөрсөн сарын дундуур зорьсон зорилгодоо хүрч Манчестер хотод очин дэмждэг багийнхаа талбай дээр дуртай хөл бөмбөгч Уэйн Рүүнитэй уулзсан гэгээн түүхийг Английн хэвлэлүүд цацаад байсан юм.

Тэгвэл 14 мянган км замыг дугуйтай туулж, зорьсон зорилгодоо хүрсэн дугуйчин Б.Очирваань өнөөдөр эх орондоо иржээ. Тэрбээр Манчестер хотоос Истанбулаар дамжин явж өнөөдөр өглөө 07:00 цагт эх орондоо ирсэн бөгөөд зорьсондоо хүрсэн дугуйчныг угтан “Манчестер Юнайтед” багийн дэмжигчид болон дугуйн спорт сонирхогчид дугуйтай парад эхлүүлсэн байна. Дугуйтай парад Степпе Аренагаас эхэлж Сүхбаатарын талбай хүрээд зогсох аж.