Хөвсгөл аймгийн цагдаагийн газарт өнгөрсөн тавдугаар сарын 31-ний өдөр “Баавгайд бариулж нас барсан байж болзошгүй” гэх дуудлага мэдээлэл иржээ. Дуудлагын дагуу цагдаагийн алба хаагчид 100 км гаруй замыг морьтой туулж хэргийн газар очиж шалгалт хийсэн байна. Урьдчилсан байдлаар тус аймгийн харьяат иргэн Б өнгөрсөн сарын 20-ны өдөр бугын эвэр түүхээр Цагаан-Үүр суманд очиж, тавдугаар сарын 27-ны өдөр тус суманд орших ойд явж байхдаа баавгайд бариулж амиа алдсан байж болзошгүй нөхцөл байдал тогтоогдоод байгаа аж.  

Иймд аялал жуулчлалын үе эхэлж байгаа энэ үеэр иргэд ан гөрөө хийх, эмийн ургамал түүхээр баталгаагүй зам маршрутаар явж амь нас, эрүүл мэндээрээ хохирох асуудал байдаг тул иргэд та бүхэн өөрийн болон бусдын аюулгүй байдлыг сахин хамгаалахыг цагдаагийн байгууллагаас сэрэмжлүүлж байна.