Сэлэнгэ аймгийн Хүдэр сумын хэмжээнд цахилгаан хязгаарлаад байна. Тодруулбал, тус суманд зургадугаар сарын 2-5 хүртэл буюу дөрөв хоног цахилгаан хязгаарлаж, засварын ажил хийж байгаа аж. Цахилгаан хязгаарласантай холбоотойгоор нутгийн иргэд гомдол гаргаж, олон нийтийн сүлжээнд "Хүдэр суманд байрлах Н.Номтойбаярын зуслан руу цахилгаан татахын тулд олон хоног иргэдийг хохироож байна" гэх зэргээр жиргэж байна. 

Бид энэ мэдээлэлтэй холбоотойгоор Хүдэр сумын ЗДТГ-ын холбогдох мэргэжилтнээс дараах тодруулгыг авсан юм. 

    Тэрбээр “Манай сум Ерөө сумаас цахилгаанаа авдаг. Ерөө сумын дэд станцыг засварлаж байгаа учир дөрөв хоног 08:00-20:00 цаг хүртэл цахилгаан хязгаарласан. Үүнийг иргэдэд албан ёсоор мэдэгдсэн. Харин олон нийтийн сүлжээнд Хүдэр суманд цахилгаан хязгаарласан асуудлыг Н.Номтойбаярын зуслантай холбож тайлбарлаж байна. Н.Номтойбаярын зуслангийн байшин манай сумаас зүүн хойд зүгт 30 гаруй километрт байрлах Янгаахай гэх газарт байдаг. Тэдний зуслан руу манай сумаас цахилгаан татаагүй юм байна лээ. Би энэ асуудлыг сумын цахилгаан хариуцсан хүнээр тодруулж асуусан. Тухайн мэргэжилтэн хэлэхдээ “Н.Номтойбаярын зуслангийн газар руу цахилгаан татах ажил хийгээгүй. Тийш нь цахилгаан татах ажлыг хийсэн байсан ч Хүдэр сумын хэмжээнд цахилгаан хязгаарлах шаардлагагүй" гэж хэлж байна лээ. Тэгэхээр цахим сүлжээнд цацагдсан мэдээлэл худал гэсэн үг.  Ерөө сумын засварын ажил өнөө орой дуусна" гэсэн юм.