Хийсэн ажилгүй ичих нүүрээ элгэндээ наасан улстөрчид энэ жилийн сонгуульд дахин нэр дэвшиж байна. Нутгийнхандаа, тойргийнхондоо юу гэж хэлж очдог юм бол гэж өмнөөс нь иргэд санаа зовох юм. Тэдний нэг нь баруун бүсэд нэр дэвшиж буй Б.Баярсайхан. Тэрбээр өнгөрсөн дөрвөн жилийн хугацаанд дорвитой хийсэн ажил, санаачилсан хуулгүй, санаачилсан нь монголчуудын амьдралд төдийлөн тус нэмэр болоогүй. Бараг Завханыхан нь мартсан байх. Харин хэд хэдэн удаа чуулганы үеэр попорч байсныг нь  уншигчид санаж байгаа биз. Тэрбээр Завхан аймгийн бүх албан хаагчид илүүдэл жинтэй хэмээн Байнгын хорооны хурал дээр хэлж, жингээ хасахад нь төсөв шаардлагатай байгааг онцолсон юм. Ингэхдээ тухайн үеийн Эрүүл мэндийн сайд асан С.Энхболдод “Би танд бичиг явуулаад одоо ямар ч хариу алга. Завхан аймгийн БҮХ ТӨРИЙН АЛБАН ХААГЧИД илүүдэл жингээсээ салъя. Наадам хүртэл гурван сарын хугацаанд шим тэжээл судлаачдыг аваачаад зөв зохистой хооллолтыг заалгаад, илүүдэл жингээсээ салаад яаж эрүүлждэгийн ард иргэддээ харуулж үлгэр дуурайлал болоод явъя гэсэн. Өнөөдөр энд зарцуулах нэг төгрөг нь ирээдүйд хавдраар өвчлөхөд зарцуулахаас хамаагүй илүү үр дүнтэй ажил байхад ХЭДЭН ТЭРБУМААР НЬ ХАВДАРТ ЗОРИУЛЧИХСАН МӨНГӨНӨӨСӨӨ 70, 80-хан сая төгрөгийг 78 мянган хүнтэй аймагт хуваарилж чадахгүй л байгаа байхгүй юу” гэсэн юм.

Х.БУЛГАНТУЯАГ ДУУРАЙЖ "ШҮГЭЛ" БОЛСОН НЬ

    Мөн Х.Булгантуяаг дуурайж, "шүгэл" болоод амжсан. Уг нь хүүхдийн хүчирхийлэлийн эсрэг санаачилга гаргаж байгаа нь тэр. НҮБ-ын Хүүхдийн сангийн дэмжлэгтэйгээр  Х.Булгантуяагийн санаачилгаар "ШҮГЭЛ" төсөл Баянзүрх дүүргээс эхлэн хэрэгжиж байгаа талаарх мэдээлэл гарч, УИХ-ын гишүүн Б.Баярсайхан, Х.Булгантуяа нар "Намайг үлээ" гэх  шүгэлтэй  зургаа нийтэлж, иргэдийн дургүйг хүргэж байсан удаатай. Хүүхдийн эрхийг хамгаалах хуулийг өнгөрсөн парламентын үед ярьж байсан ч хөрсөнд буусан хуультай болж чадаагүй гэхэд болно. 13 эмэгтэй гишүүний хүүхдийн төлөө хийчих ажил байсан ч харамсалтай нь хуруугаа ч хөдөлгөхгүй суусаар дөрвөн жилийг өнгөрүүллээ. Нүүрсний хэрэг, Хөгжлийн банкны хэрэгийн араас койны хэрэг дуулиан тариад байгаа. Том том, тендер, хулгайн хэргийн ард улстөрчид байдаг шиг койны хэрэгт ч улстөрчид холбогддог байна. Өөрөөр хэлбэл, койнчид улстөрчдын санхүүжүүлэгч болдог гэх. Б.Баярсайхан ч койнчин Х.Эрдэнэбаярын босгосон мөнгөөр сонгуулийн ажлаа хийсэн гэдэг. Зах зээлд “WPL” нэртэй койн гаргаж, нийт 18 тэрбум төгрөг босгосон “Ворлд плас дижитал” ХХК-ийг захирал “Хасагийн Эрдэнэбаяр гэгчийг хохирогчид нь эрэн сурвалжилж буй. Х.Эрдэнэбаяр нь “WPL” койныг гаргах үедээ байрлаж байсан оффисийнхоо түрээсийг ч өгөлгүй гадаад руу гарч зугтсан гэгдэж байсан.

КОЙНЫ МӨНГӨӨР УЛС ТӨРД ОРЖ ИРСЭН  Б.БАЯРСАЙХАН

     Ноцтой нь, Хасагийн Эрдэнэбаяр нь “Ворлд плас дижитал” ХХК-ийг 2018 онд Ерөнхий сайд Л.Оюун-Эрдэнийн зөвлөх Эрдэнэбаатарын Долгион, Ашигт малтмал газрын тосны газрын Газрын тосны ашиглалтын хэлтсийн дарга Сангарагчаагийн Пүрэвжав, Хакухо М.Даваажаргал буюу Шо Хакухо, Япон Улсын иргэн Мотохару Кимура, Баярсайханы Батжаргал нар хамтран байгуулсан. “Койн”-той холбоотой хэл ам гарч эхэлмэгц Э.Долгион, Хакухо М.Даваажаргал, Мотохару Кимура нар хувьцаа эзэмшигчээс нэрээ хасуулсан. Одоо тус компани Х.Эрдэнэбаяр, С.Пүрэвжав, Б.Батжаргал нарын нэр дээр байгаа юм. Тэгвэл “Ворлд плас дижитал” ХХК-ийн захирал, “WPL” нэртэй койноороо 18 тэрбум төгрөг босгоод зугтсан гэх Х.Эрдэнэбаяр нь УИХ-ын гишүүн Б.Баярсайханы сонгуулийн хандивлагч ажээ. Тодруулбал, УИХ-ын гишүүн Б.Баярсайханд 2020 оны сонгуулиар 86 хүн 1-5 сая төгрөг хандивлаж, 296 сая төгрөгийн санхүүжилт босгосны нэг нь Хасагийн Эрдэнэбаяр гэгч ажээ.