Ашигт малтмал хайх, ашиглах зориулалтаар газар, түүний хэвлийг тусгай зөвшөөрлөөр олгох, төлбөр, татвар ногдуулах, хураахтай холбоотой үйл ажиллагаанд хяналт шалгалт хийх” сонсгол хоёр дахь өдрөө үргэлжилж байна.

           Энэ үеэр  ХЯНАН ШАЛГАХ ТҮР ХОРООНЫ ГИШҮҮН Ц.САНДАГ-ОЧИР: Монгол Улс 1994 оноос Ашигт малтмалын лицензийг олгож эхэлсэн. Лиценз олголтын тусгай зөвшөөрлийн асуудалд Б.Нямтайшир та болон танай гэр бүлийн хамаарал бүхий нийтдээ 40 орчим лицензийг тусгай зөвшөөрлөөр танай компани эзэмшиж байна гэсэн мэдээлэл гарсан. Нэг гэр бүл яаж, ямар аргаар энэ олон лицензийг авдаг юм бэ. Хэдийг нь өргөдлөөр, сонгон шалгаруулалт, цахимаар авсан бэ. Өнөөдөр стратегийн 16 ордын хоёрыг нь танай компани эзэмшиж байна. Улсад хэр хэмжээний татвар төлсөн, хэчнээн мянган ажлын байр бий болгосон бэ, орон нутгийн эдийн засаг, нийгмийн хөгжилд ямар хувь нэмэр оруулж байна вэ.

               "МАК" ХХК-ИЙН ЗАХИРАЛ Б.НЯМТАЙШИР: "МАК ХХК бол геологи, хайгуул, уул уурхайн үйлдвэрлэл явуулах боловсон хүчнээс бүрдсэн 30 гаруй жилийн түүхтэй. 1993 оны арванхоёрдугаар сард байгуулагдаж, уул уурхайн үйлдвэрлэлийг бусдын лицензтэй орд дээр түрээсээр ашиглах байдлаар үйл ажиллагаагаа явуулж байсан. Өнөөдөр харин 4000 гаруй ажилтантай, улсдаа нэг их наяд шахуу төгрөгийн татвар төлсөн байна. Жил бүр эхний арван татвар төлөгч компаниар шалгардаг. Мөн орон нутагт үйл ажиллагаа явуулж буй сургууль, дотуур байр, Хүүхэд залуучуудын төвд ч хөрөнгө оруулалт оруулж ажилласан. Түүнээс гадна Хятадаас шугам татаж аймаг, сумдын эрчим хүчийг хангах ажилд чиглэн ажилласан. Тухайлбал, Өмнөговь аймгийн гурван сумыг эрчим хүчээр хангаж, өнөөдрийн байдлаар 35 шугам Хятадаас татсан байна. Мөн орон нутагт ажлын байр бий болгох, жижиг, дунд үйлдвэрийг хөгжүүлэх чиглэлд анхааран ажилласан. Экспортын хувьд өнгөрсөн жил улсдаа хоёрдогч нүүрсний экспорт компани болсон. Засгийн газрын боомтын сэргэлт бүтээн байгуулалтын ажлыг бид мөн хариуцаад, хувийн хөрөнгөөрөө бүтээн байгуулалт хийсэн. Сүүлд гэхэд "Өсөх зоос" ХХК-ийн төмөр замын асуудлыг дуусгалаа. Энэ мэтээр бид улс, нийгмийнхээ бүтээн байгуулалтын ажилд оролцож байна.  Харин 40 лицензийн асуудал бол цахимаар хоёр, өргөдлөөр 34, сүүлд сонгон шалгаруулалтаар дөрвөн лиценз авсан байна.  Ашигт малтмалын тухай хуулиар  хувь хүний нэр дээр лиценз олгодоггүй. Тус хуульд Монгол Улсад бүртгэлтэй үйл ажиллагаа явуулж байгаа татвар төлөгч компанид зөвшөөрөл олгоно гэж заасан байгаа. Иймээс лицензийн тоогоор асуудал ярих биш лиценз болон эрдэс баялаг дээр түшиглээд, барууны шилдэг техник технологийг нэвтрүүлэн, ажлын байр, нэмүү өртөг шингэсэн бүтээгдэхүүн гаргах нь чухал.