"Ашигт малтмалын лиценз"-тэй холбоотой нотлох баримтыг шинжлэн судлах сонсгол үргэлжилж байна.

                 Энэ үеэр Хянан шалгах түр хорооны гишүүн Ц.Сандаг-Очир "Ашигт малтмалын газар өөрсдийнхөө бурууг хүлээн зөвшөөрөх хэрэгтэй. Иргэний газар өмчлүүлсэн байхад танайх зөвшөөрөл олгосон байна. Нөгөө талаар аймаг лицензийн тусгай зөвшөөрөл олгосон байхад иргэдийн газар өмчлүүлэх зөвшөөрөл олгосон. Хоёулаа аль ч талаасаа хуулиа зөрчөөд газар олголт хийгдсэн байна. Үүнийгээ хүлээн зөвшөөрөх хэрэгтэй. Энэ бол төрийн байгууллагуудын хоорондын уялдаа холбоо, бүртгэл судалгааны холбоогүйгээс болж иргэд, хөрөнгө оруулагчид хохирох, маргах, шүүхээр эцэслэн он удаан жил хөөцөлдөх асуудал үүсээд байна. Өнөөдөр өөрсдийгөө хамгаалаад хариу тайлбар хийсэн болоод өнгөрч байна. Цаана нь 800 гаруй иргэд хохирч байна. Хөрөнгө оруулалтаа хийсэн аж ахуй нэгжүүд хохироод шүүхэд дуудагдаад яваад байна. Л.Сэр-Од та сонгуульд нэр дэвшээд явж болно. Нэр хүндийг чинь унагах асуудал яриагүй. Танай аймагт 800 иргэний асуудал гарсан учраас таниас зөвшөөрөл авсан уу, үгүй юу гэдгийг асуух гэж гэрчээр дуудсан байна. Таниас аваагүй байхад Ашигт малтмалын газар зөвшөөрөл олгосон байна" гэв.