УИХ-ын сонгуулийн дөрөвдүгээр тойрогт ардчилсан намаас нэр дэшихээр бүртгүүлсэн Б.Мягмарсүрэнгийн нэр нь хасагдаж оронд нь Ерөнхийлөгч асан Д.Өсөхбаяр орсон гэх мэдээлэл бий. Тэрбээр өөрийн цахим хуудастаа “Би 2024 оны УИХ-ын сонгуулийн дөрөвдүгээр тойрог буюу Орхон, Булган, Хөвсгөл аймгуудыг хамарсан Хойд бүс нутагт АН-аас нэр дэвшин өрсөлдөхөөр бэлтгэлээ хангаж байсан юм. Тавдугаар сарын 20-ны өдөр хуралдсан АН-ын Үндэсний бодлогын хорооны /ҮБХ/ хурлаар намын дарга Л. Гантөмөр сонгуулийн тойрог бүрээр нэг бүрчлэн нэр дэвшигчдээ танилцуулж, санал хураалган баталгаажуулсан. УИХ-ын сонгуулийн дөрөвдүгээр тойрогт Б. Мягмарсүрэн миний нэрийг мөн бусад долоон нэр дэвшигчийн нэрсийг уншиж сонсгон, санал хурааж тогтоолоор баталсан юм. Гэтэл тухайн өдрийн ҮБХ-ны хурлаар батлагдсан нэрс дотроос шөнийн 00 цагаас хойш миний нэрийг хасаж Д.Өсөхбаярын нэрийг сольж оруулсан хууль бус үйлдэл болсон байна. Түүний нэр нь АН-ын Нэр дэвшигчийг сонгон шалгаруулах хороо болон ҮБХ-ны хурлаар дэмжигдээгүй юм. Би учрыг нь олох санаатай тавдугаар сарын 21-нд Д.Өсөхбаяр руу утсаар залгахад аваагүй, мессеж бичсэн ч хариу өгөхгүй байна. АН-ын гишүүнийхээ хувьд намынхаа дотоод асуудалд хүлээцтэй, хүндэтгэлтэй хандаж долоо хоног асуудал тавилгүй, тэвчээртэй хариу хүлээж байсан боловч ямар шалтгаан нөхцлөөр нэр хассан тухай тайлбар ирээгүй бөгөөд тавдугаар сарын 25-ны өдөр нэр дэвшигч миний нэрийг хассан байдалтайгаар СЕХ-нд матeриалаа хүргүүлжээ. Иймд хууль, дүрэм журмыг уландаа гишгэж байгаа шударга бус үйлдлийг эсэргүүцэж байгаагаа өөрийн цахим хаягаар дамжуулан олон нийтэд мэдээлэл хүргэж байгаа юм. БИ энэ СОНГУУльд нэр дэвшихгүй байсан ч болно. Гэвч энэ мэт хууль зөрчсөн үйлдлийг үл тоож орхиж гэмээнэ цаашдаа улс оронд, улс төрийн намуудад буруу жишиг тогтож олон шударга залуусын ирээдүйг хулгайлах нөхцөл үүснэ. Иймд АН-аас тойрогт нэр дэвшигчдийн нэрсийн жагсаалтанд ХУУЛЬ зөрчин нэрээ сэм шургуулсан Д.Өсөхбаярын хууль бус үйлдлийг шалгуулж, нэрийг нь ТАТУУЛАХ хүртэл хариуцлага тооцуулахаар СЕХ-нд өнөөдөр баримт нотолгоо бүхий гомдол хүргүүллээ. Цаашлаад шаардлагатай бол шат шатны Шүүхийн байгууллагад хандаж хуулийн зөрчлийг арилгуулж, хариуцлага тооцох хүртэл нь тэмцэх болно. Хуулийн дагуу УИХ-ын сонгуулийн тойрогт болон жагсаалтанд нэр дэвшиж байгаа АН-ын нийт нэр дэвшигчиддээ амжилт хүсьe ээ. Монгол төрийн босго өндөр байх болтугай” гэжээ.