Сонгуулийн Ерөнхий хорооноос нэр дэвшигчдийн материалыг хүлээн авсан талаар мэдээлэл өглөө. Энэ талаар холбогдох албаныхан “Сонгуулийн Ерөнхий хороонд 1370 нэр дэвшигчийн баримт ирсэн байна. Бие даан нэр дэвшигчдийн тухайд Үндэсний аудитын байгууллагад 77 хүн мөрийн хөтөлбөртөө дүгнэлт гаргахаар хүргүүлсэн. СЕХ-нд 47 бие даан нэр дэвшигч бүртгүүлж, хуулийн хугацаанд холбогдох баримт материалаа хүргүүллээ. Нэр дэвшигчдийн баримт материалыг долоо хоногийн дотор хуульд заасны дагуу шалгаж, бүртгэх эсэхийг шийдвэрлэнэ. Зургадугаар сарын 1-ны өдөр дээрх нэр дэвшигчдийн бүртгэх эсэх асуудлыг шийдвэрлэж, тогтоол гаргахаар хуульчилсан. АН-аас 126 нэр дэвшигчийн мэдээлэл ирсэн. Мөн СЕХ-нд Ардчилсан намаас тогтоол ирүүлсэн байна. Бид иргэдээс гаргасан хүсэлтийг баримтын хамт хүлээж авах үүрэгтэй. СЕХ Ардчилсан намаас нэг баримт, нэг тогтоолыг хүлээн авсан. Мөн хоёр иргэнээс мэдээлэл хүлээн авсан. АН-аас СЕХ-той шууд холбогдох хүн тус тогтоол дээр техникийн алдаа гарсан хэмээн 74 хүний нэр, баримтыг ирүүлсэн байна. Дээрх тогтоол, хүсэлтийг хуралдаанаар хэлэлцэж нэгдсэн байдлаар мэдээлэл өгнө. Ардчилсан намаас тус асуудлаар нь тодруулга, мэдээлэл авахаа мэдэгдсэн” гэв.