Улсын Их Хурлын 2024 оны ээлжит сонгуульд оролцохоор бүртгүүлсэн 23 нам, 2 эвслээс нэр дэвшигчид болон бие даан нэр дэвшүүлэгчдийн баримт бичгийг Сонгуулийн ерөнхий хорооноос томилсон Ажлын хэсэг хүлээн авч байна.

Нам, эвслээс нэр дэвшүүлсэн тогтоол болон хуульд заасан баримт бичгийг нэр дэвшигч тус бүрээр бүрдүүлэн Сонгуулийн ерөнхий хороонд хүлээлгэж өгөх учир энэ сарын 24, 25-ны өдөр тодорхой хуваарьд цагуудад баримт бичиг хүлээн авна.

Ажлын хэсэгт энэ сарын 24-ний өдөр Эх орончдын нэгдсэн нам, Иргэдийн Оролцооны Нэгдэл Нам, Үнэн ба Зөв нам, Монголын Социал Демократ Нам, Эх Орон намаас Улсын Их Хурлын 2024 оны ээлжит сонгуулийн тойрогт нэр дэвшүүлэх 131, жагсаалтаар нэр дэвшүүлэх 26 нэр дэвшигчийн баримт бичгийг ирүүллээ. Түүнчлэн 35 бие даан нэр дэвшүүлэгч баримт бичгээ ирүүлэв.