Либертари намын дарга Д.Амартүвшин жагсаалтаас нэрээ татах талаар мэдээлэл хийлээ. Либертари намыг Дээд шүүх бүртгээгүй учир Ардчилсан намтай хамтарсан билээ. Тэрбээр жагсаалтын 29-д бичигдсэн. 

          Тэрбээр “Өчигдөр Либертари намынхан маань хуралдсан. Манай намыг дээд шүүх дээр бүртгэж аваагүй. Зургаан нам, эвслээс АН-тай хамтрахаар болсон. Бид Сүхбаатар, Чингэлтэй дүүргийн тойрогт нэр дэвшихээр тохирсон байсан. Тойрог дээр хүмүүстэйгээ уулзаад яагаад чөлөөт зах зээл байх ёстой вэ, яагаад татвар ийм өндөр байна вэ, яагаад бид данхар төртэй байна вэ, энэ нь эргээд бидний эдийн засгийг, өнөөдрийн амьдралыг боомилж байна шүү гэдгийг нүүр нүүрээ хараад ярилцах нь чухал байлаа. Мөн Сүхбаатар дүүрэгт ЖДҮ авсан, дээрээс цүнх барьдаг, эрх чөлөөнд халтай хүмүүс нэр дэвшиж байгаа тул тэр хүмүүсийг байх ёстой газар нь тавьж, хүчийг үзье гэж бодож байсан. Гэтэл нэг дэх өдрийн шийдвэрээр боломжгүй боллоо. Бид жагсаалтад орох сонирхолгүй байна. "Угжны хурга" биш, тойрог дээр очоод нүцгэн нөгөө хүмүүстэй өрсөлдье гэсэн ч болсонгүй. Бид жагсаалтаас нэрээ татаж байна. Ямартай ч боломж олгосон хүмүүст баярлалаа. Ардчилсан намын залуус бол үнэхээр шилдэг юм билээ, тэрийг ойлгосон. Монголд эрх чөлөө улам их дэлгэрэх болтугай" гэв.