АН-ын Үндэсний бодлогын хороо хуралдаж байна. Энэ үеэр хуульч Р.Булгамаа сэтгүүлчдэд мэдээлэл өглөө.

Тэрбээр “Үндэсний бодлогын хорооны гишүүд ач холбогдол өгч, идэвхтэй оролцож байна. Энэ удаагийн сонгуульд алдагдсан найман жилийн боломжийг авчиръя гэдэг хүн, хөгжил төвтэй мөрийн хөтөлбөр дэвшүүлж байгаа. Мөрийн хөтөлбөрийн нийгэмд хэрэгжүүлж, нийт хүн ам, ард иргэдийн амьдрал ахуйнд тодорхой хэмжээний амьдралын чанарын дэвшил бий болгох ийм ач холбогдолтой мөрийн хөтөлбөрүүд дэвшүүлж орж байгаа учраас намын болон Үндэсний бодлогын хорооны гишүүд нэлээн санал санаачилгатай идэвхтэй оролцож байна. Миний хувьд 2015 оноос Үндэсний бодлогын хорооны гишүүнээр сонгогдож ажиллаж байгаа. Энэ удаагийн сонгуульд жагсаалаар нэр дэвших хүсэлтээ намдаа өгсөн. Өмнө нь хоёр удаа Ардчилсан намаас сонгуульд нэр дэвшсэн. Ингэхдээ оч гэсэн тойрогт нь очиж байсан.  Энэ удаагийн сонгуулийн тогтолцоо үнэхээр онцлогтой. Жагсаалтын ард ямар нэгэн бизнес, фракцын итгэмжлэгдсэн төлөөлөл байдлаар оролцож болохгүй. Жагсаалт гэх зүйлийг би харахдаа ард иргэдийн төлөө дуу хоолой байгаасай гэж гаргасан болов уу. Ардчилсан намыг ч тэгж ойлгоосой гэж хүссэн. Өнөөдрийн Үндэсний бодлогын хорооны гишүүдийн байр байдал, намын хурлын өнгө аясаас харахад харамсалтай нь тийм биш бололтой. Фракцуудын төлөөлөл эрэмбэ дараалан жагсах боломжтой юм шиг байна. Энд байгаа Үндэсний бодлогын хорооны гишүүдэд итгэл алдарч байна. Гэхдээ ямар ч шийдвэр гарсан би хүндэтгэлтэй хандана. Би Монгол Улсын иргэдийн эрх, эрх чөлөөний төлөө би 20 гаруй жил ажиллаж ирсэн” гэв.