Монгол Улсын Ерөнхийлөгч асан Н.Багабанди сэтгүүлчдийн асуултад хариуллаа.

Тэрбээр “Сонгуульд нэр дэвших асуудлын манай намын дарга нар өөрсдийн байр сууриа илэрхийлсэн. Тэр зарчмын дагуу гишүүдээ тодруулж, УИХ-ын сонгуульд нэр дэвшүүлнэ. Авлига, албан тушаалаа урвуулан ашигласан хэрэгтэй холбогдож байсан хүмүүсийн нэр дэвшүүлэхгүй гэсэн саналтай бүрэн санал нийлж байгаа. УИХ-ын гишүүн болоход бэлтгэгдсэн хүмүүс жагсаалтаар ороосой гэж бодож байна. Мөн жендерийн асуудлыг тодорхой тавьсан. Эмэгтэйчүүд, залуусын төлөөл олон ороосой гэж хүсэж байна. Мөнгөний биш цэвэр үзэл бодол, бодлогын сонгууль болох байх гэж найдаж байна. Нэвтрүүлгээ хэзээ хийх нь уран бүтээлч та бүхний эрх шүү дээ. Тэр эрхийнхээ дагуу хэзээ хийхээ мэдээд хийж байгаа байх. С.Зоригийн хэргийн талаарх миний мэдээлэл хуучирсан байх. С.Зоригийн ерөнхий сайд болох асуудлыг ярьж байсан. Би С.Зоригийн нэр орж ирвэл дэмжинэ гэсэн байр суурьтай байсан. С.Зоригийн хэрэг сонгуультай, сонгуульгүй илрэх ёстой. Хэзээ ч байсан илрэхгүй байж болохгүй” гэв.