Зориг агсны амиа алдсан хэргийн газраас олдсон үсний ДНК шинжилгээний хариу АНУ-аас ирсэн талаар Цагдаагийн ерөнхий газраас мэдээлэл өглөө.

               Энэ үеэр Мөрдөн байцаах албаны хүнд гэмт хэрэг мөрдөн шалгах хэлтсийн дарга, цагдаагийн хурандаа Б.Энхтөр “С.Зориг бусдын гарт амиа алдсан хэрэгт Тагнуулын ерөнхий газар болон Цагдаагийн ерөнхий газрын хамтарсан Ажлын хэсэг байгуулагдах тухай тушаалаар байгуулагдсан. Ажлын хэсгээс мөрдөн шалгах ажиллагааг явуулж байна. Цагдаагийн байгууллагаас 1998 оны аравдугаар сарын 3-ний өдөр хэрэгт хураагдсан эд мөрийн баримтуудад АНУ-ын ДНК шинжилгээний байгууллагын дэвшилтэд технологийг ашиглан энэ онд шинжилгээ хийлгэж эд мөрийн баримтуудаас ДНК мэдээлэл тогтоосон. Хэрэгт 26 жилийн турш тасралтгүй мөрдөн шалгах ажиллагаа явуулсан боловч анх удаа ийнхүү ДНК мэдээлэл шинээр тогтоож байна. Энэхүү мэдээлэл нь урд энэ хэрэгт холбогдуулан шалгагдаж байсан бусад хүний ДНК мэдээлэлтэй тохироогүй. Харин энэ нь хэний мэдээлэл болохыг тогтоох хамтарсан Ажлын хэсэг мөрдөн шалгах ажиллагааг үргэлжлүүлэн явуулж байна” гэв.