“E-Mongolia 4.0” хувилбар нь иргэдийн хэрэгцээт багц үйлчилгээг санал болгосон, дуу хоолойгоор дамжуулж үйлчилгээ авах, чатботоор хүссэн мэдээллээ авах боломжийг бий болгож, иргэд хоорондоо харилцах үндэсний чатыг багтаажээ. Мөн эрүүл мэндийн үйлчилгээнүүдийг цахим хэлбэрт шилжүүлж олон нийтэд хүргэх шаардлагатай сонордуулга, мэдээллийг цаг алдалгүй хүргэдэг болсон байна.

                  Шинэчилсэн хувилбараас 86 байгууллагын 1233 үйлчилгээг авч болох бөгөөд иргэдэд тохирсон үйл ажиллагааг санал болгох юм.

“E-Mongolia 4.0” хувилбараар дараах үйлчилгээг хурдан шуурхай авах боломжтой болжээ.

•  Зээл авах, виз мэдүүлэх, бичиг баримт захиалахад шаардлагатай лавлагаа болон тодорхойлолтуудыг нэгтгэжээ.
• Хүссэн үйлчилгээгээ дуу хоолойн тусламжтай хайх, авах
• Замын хураамж, тээврийн болон жолоочийн торгууль, үер, угаарын хийн мэдрэгчийн мэдээллийг гар утас,ухаалаг төхөөрөмжийн тусламжтай хаана ч байсан хүлээн авах
• Төр хувийн хэвшлийн хамтын ажиллагааны хүрээнд “Монголнэт” ХХК-тай хамтран E-Mongolia системийн хэрэглэгчид хоорондоо чат бичих боломжтой болсон
• Өвчний оношинд тохирсон эмнэлгийг сонгох, шинжилгээ болон дүрс оношилгооны хариу харах, эмийн жорын түүхээ харах, AR технологи ашиглан эмийн танилцуулгыг үзэх зэргээс гадна жирэмсэн үеийн бүхий л үйл явцаа хянах боломжтой болсон.
• Дархлаажуулалтын мэдээллийг хянах хэсгээр дамжуулан заавал хийх үндэсний төлөвлөгөөт дархлаажуулалтаа хянах боломжтой.