Монголын Сэтгүүлчдийн Нэгдсэн Эвлэлээс хэвлэлийн хурал зохион байгуулж, “Хэвлэлийн эрх чөлөө гавлагдав” акц зохион байгуулах талаараа мэдээлэл өгсөн. Тэгвэл энэ хүрээнд “Хэвлэлийн эрх чөлөө гавлагдав” цуглаанд улс төрийн нам, эвслүүдийг нэгдэж, сонгуулийн мөрийн хөтөлбөртөө сэтгүүлчийн эрхийг хамгаалсан зүйл заалт оруулахыг уриалж буй тухай мэдэгдэв.

                           Энэ тухай МСНЭ-ийн Ерөнхийлөгч Ө.Отгонбаатар “Монголын Сэтгүүлчдийн Нэгдсэн Эвлэлээс Олон улсын сэтгүүлчдийн холбооны гишүүний хувьд хоёр удаа хүсэлт тавьсан. Бидэнд тодорхой хэмжээний зөвлөмж өгч, манай улсад ирж Эрүүгийн хуулийн зүйл заалтаар яллагдагчаар татагдаад байгаа сэтгүүлчидтэй уулзаж, бодит нөхцөл байдалтай танилцан төр, засгийн удирдлагуудад зөвлөмж өгөх хүсэлтүүд гаргасан. Харин МСНЭ-ээс тавьсан хүсэлтүүдийн хариу бол Олон улсын сэтгүүлчдийн холбооноос төр засгийн удирдлагууд болон холбогдох хүмүүст ил захидал илгээж байгаа. Ил захидлын албаны ёсны хувилбарыг тавдугаар сарын 3-ны хэвлэлийн эрх чөлөөний өдрөөр танилцуулж, ирсэн зөвлөмж, шаардлагуудыг төр засгийн удирдлагуудад гардуулж өгнө.

Мөн Монголын Сэтгүүлчдийн Нэгдсэн Эвлэлээс улс төрийн намуудад төв талбай дээр бидний “Хэвлэлийн эрх чөлөө гавлагдав” цуглаанд нэгдэхийг уриалж, “Сонгуулийн мөрийн хөтөлбөртөө сэтгүүлчдийн эрхийг хамгаалсан зүйл заалт оруулаач ээ” гэсэн уриалга хүргүүлж байгаа” гэлээ.