Баянзүрх хорооллын гадна хууль бусаар барилга барих гэж байгаа асуудлыг иргэд эсэргүүцэж байгаагаа илэрхийллээ.

         Энэ үеэр Баянзүрх хорооллын 103 -р байрны хэсгийн ахлагч Ганцэцэг “Өнгөрсөн гурав дахь өдрийн шөнө 00:00 цаг өнгөрч байхад "Байрны гадна газар ухах гэж байна" гэсэн мэдээллийн дагуу оршин суугч иргэд цагдаа дуудаад болиулсан, маргааш орой нь мөн газар ухах гэснийг нь зогсоосон. Гэтэл амралтын өдрүүдэд иргэдээс трактороор зам эвдээд байна гэсэн гомдол ирсэн. Тэгээд хариуцаж байгаа газрын эзэнтэй нь утсаар ярьсан чинь “Спорт цогцолбор барих гэж байгаа” гэсэн. Манай хорооны ИТХ-ын даргад газар ухах гэж байгаа талаар уг нь хэлсэн юм байна лээ. Тэгэхэд нь хорооны дарга “Манай хорооны 103 байрны оршин суугчид зогсоол байхгүй, тиймээс нэг давхраа зогсоол болгож өгөөч. Тэгэхдээ байрны хашаанаас 4-5 метрийн зайтай газраа ухаарай” гэсэн байгаа юм. Гэтэл хашааг нь ухаад, нийтийн эзэмшлийн талбай руу хоёр метр орсон байна. Үүний улмаас 16 давхар барилгын 143 өрх эрсдэл учирч байна" гэв.