Төв цэнгэлдэх хүрээлэнг нийслэл өмчид авах асуудлыг өнөөдрийн НИТХ-ын хуралдаанаар хэлэлцжээ. Энэ үеэр Нийслэлийн Засаг дарга бөгөөд Улаанбаатар хотын захирагч Х.Нямбаатар “Үндэсний баяр наадмаа хийдэг цэнгэлдэх хүрээлэнг засварлах ажил хуваарийн дагуу явж байгаа. Энэ жил баяр наадмын үеэр цэнгэлдэх хүрээлэн тойрсон замбараагүй худалдаа үйлчилгээг хална. Хуушуур хайрчихаар хэрэглэсэн тосоо зүлгэн дээр асгадаг байдлыг хүлээн зөвшөөрөхгүй. Энэ төрлийн худалдаа, үйлчилгээ эрхлэх стандарт тогтоож, сонгон шалгаруулалт хийнэ. Түүнчлэн цэнгэлдэх хүрээлэнгээ тойруулаад углааш, эрээн мяраан хувцас хунар зараад байж болохгүй. Худалдаа эрхэлдэг газартаа энэ төрлийн үйлчилгээгээ хийх хэрэгтэй. Соёлын яамтай хамтарч Өндөр гэгээн Занабазарын урласан 21 дарь эх, Монголын уран зургийн галерейн хосгүй үнэт үзмэрүүд зэрэг соёлын өвөө олон нийт болон жуулчдад дэлгэж харуулъя гэж байгаа” гэв.