Эмийн үнийн өсөлтийн шалтгаан, нөхцөлийг хянан шалгах түр хорооны нотлох баримтыг шинжлэн судлах сонсгол үргэлжилж байна. Өнөөдрийн сонсголоор Эмийн чанарын хяналтын тогтолцоо, цувралын хяналт, эмийн чанарыг шинжлэх лабораторийн хүчин чадал, өнөөгийн нөхцөл байдал, зонхилох тохиолдох өвчинд хэрэглэх зарим эмийн шинжилгээний дүн зэрэг асуудлаар сонсгол үргэлжилнэ. Энэ үеэр шинжээч үг хэллээ.

         Тэрбээр “Эм, эмнэлгийн хэрэгслийн хяналт зохицуулалтын газрын Эм шинжлэх лаборатори, Анагаахын шинжлэх ухааны үндэсний их сургуулийн Эм шинжилгээний лабораториудын шинжилгээний тохирлын дүнг шалгахад нэг нэр, нэг цувралын дугаар бүхий найман эм, биологийн идэвхт бүтэгдэхүүний шинжилгээний хариу лабораториудад зөрөөтэй гарсан. Жишээ нь, Агентлагийн лабораторид шаардлага хангаагүй гэсэн хариу гарсан байхад, Анагаахын сургуулийн лабораторид тухайн цувралын дугаараар ороод шаардлага хангасан гэж гарч ирсэн байна. Нэг лабораторид шинжилгээнд тэнцээгүй ч нөгөө лабораторид шинжилгээнд тэнцсэн нийт найман эмийн зургаа нь Хүний эмийн зөвлөлийн хуралд орж бүртгэлийн хугацаа сунгагдсан байна” гэв.