Цагдаагийн байгууллагад өчигдөр Баянзүрх дүүргийн 10 дугаар хорооны нутаг дэвсгэрт байрлах “Ерөнхий боловсролын 147 дүгээр сургууль дотор нулимс асгаруулагч цацсан юм шиг байна, хүүхдүүдийн хоолой боогоод байна” гэх дуудлага, мэдээлэл  ирсэн. Урьдчилсан байдлаар тус сургуулийн сурагч биедээ авч явсан "Нулимс асгаруулагч" мэт хий төлөвтэй зүйлийг ангийнхандаа сонирхуулах зорилгоор цацсан нөхцөл байдал тогтоогдож, тус сургуулийн сурагч, ажилтан, алба хаагчдын толгой өвдсөн, нулимс нь гоожсон, нүд хорссон гэх зовиуртайгаар эмнэлгийн байгууллагын тусламж аваад байгаа талаар мэдээлсэн.

Тэгвэл уг асуудлаар 147 дугаар сургуулийн сургалтын менежертэй холбогдож тодруулахад "Хууль хяналтын байгууллага дээрх асуудлыг шалгаж байгаа. Өнөөдөр манай сургууль цахимаар хичээллэсэн. Нулимс асгаруулагч гэх хийнд хордсон хүүхдүүдийн биеийн байдал тогтворжиж олонх нь гэртээ харьсан. Дөрвөн хүүхэд эмнэлэгт хэвтэн эмчлүүлж байна. Бид үүнээс өөр мэдээлэл өгөх боломжгүй" гэлээ.