Эмийн үнийн өсөлтийн шалтгаан, нөхцөлийг хянан шалгах түр хорооны нотлох баримтыг шинжлэн судлах сонсгол үргэлжилж байна. Хянан шалгах сонсголыг нээж  Хянан шалгах түр хорооны дарга, УИХ гишүүн Ж.Чинбүрэн үг хэллээ.

Тэрбээр “Нийтийн сонсголын тухай хуулийн дагуу ирц хангалттай. Энэ удаагийн Түр хорооны нотлох баримтыг шинжлэн судлах сонсголыг дөрөвдүгээр сарын 15,16,17-ны өдрүүдэд зохион байгуулна. Хянан шалгах түр хорооны 2024 дөрөвдүгээр сарын 8-ний өдрийн тогтоолоор нотлох баримтыг шинжлэн судлах дарааллыг тогтоосон. Эмийн сонсголд 11 хянан шинжээч, 1164 албан тушаалтан, 6200 нотлох баримт, 153000 цаасан нотлох баримт, 85000 цахим файл, 150 гэрч оролцож, шалгалт хийнэ. Түр хорооны гишүүдийн 100 хувийн ирцтэйгээр сонсгол эхэлж байна.

Сонсголын дарааллыг танилцуулъя.

Дөрөвдүгээр сарын  15-нд эмийн хүртээмжийн асуудлаар сонсгол хийнэ. Монгол Улсын эм зүйн салбарын өнөөгийн нөхцөл байдал ба тулгамдаж буй асуудал, зайлшгүй шаардлагатай болон хөнгөлөлттэй эмийн зохицуулалт, зайлшгүй шаардлагатай эмийн жагсаалтад албан тушаалтан нөлөөлсөн байдал, төрийн байгуулга дахь эм ханган нийлүүлэгчийн хамаарал гэсэн сэдвийн хүрээнд өнөөдрийн сонсгол үргэлжилнэ.

Дөрөвдүгээр сарын  16-нд эмийн үнийн өсөлт ба шалтгаан нөхцөл гэсэн хүрээнд ярилцана. Эмийн үнийг бүрдэл болон эмийн үнэнд нөлөөлсөн хүчин зүйл, эмийн үнийн мэдээлэл ил тод байдлын талаарх өнөөгийн нөхцөл байдал, чанаргүй болон хугацаа дууссан эмийн устгалын талаар хянан шалгалтаар илэрсэн асуудлын талаар сонсгол явуулна.

Дөрөвдүгээр сарын 17-нд эмийн бүртгэл болон чанарын хяналтын асуудлаар ярилцана. Эмийн чанарын хяналтын тогтолцоо, цувралын хяналт, эмийн чанарыг шинжлэх лабораторийн хүчин чадал, өнөөгийн нөхцөл байдал, зонхилох тохиолдох өвчинд хэрэглэх зарим эмийн шинжилгээний дүн, Монгол Улс дахь эмийн бүртгэлийн өнөөгийн нөхцөл байдал, эмийн зөвлөлийн томилгооны зохицуулалт, эмийн бүртгэл дэх ашиг сонирхлын зөрчил болон хянан шалгалтаар илэрсэн асуудал, эм хангамжийн тусгай зөвшөөрөл олгох явцад ашиг сонирхлын талаар, эмийн салбар дахь монопол болон гурван өдрийн турш яригдсан асуудлыг дүгнэж Монгол Улсад эмийн  салбарын хяналт шалгалтын тогтолцоог сайжруулах асуудлаар дүгнэлтийг танилцуулна.