Монголын Хүүхдийн Зохиолчдын Холбооны тэргүүн, хүүхдийн зохиолч Н.Энхтайваны "НОГООН ДЭЛХИЙ" цуврал 18 бүтээлийг Соёлын яамнаас зохион байгуулсан оны шилдэг уран бүтээл шалгаруулах "МӨНГӨН МОД" наадмын шилдэгийн шилдэг номоор шалгаруулжээ. Хүүхдийн зохиолч Н.Энхтайван хүүхдийн уран зохиолтой хориод жил нөхөрлөж, 30 гаруй ном туурвисан. “НОГООН ДЭЛХИЙ” ЦУВРАЛ ном нь Боловсрол, Соёл, Шинжлэх Ухаан, Спортын Яамны “ШИЛДЭГ НОМ”-оор шалгарч улсын хэмжээний ерөнхий боловсролын 556 сургуулийн номын сангийн захиалгаар 35,000 хувь хэвлэгдэж номын сангийн баяжилтанд орсон.

    Дэлхий банк, Азийн хөгжлийн банк, Даян дэлхийн байгаль хамгаалах сангийн захиалгаар удаа дараа хэвлэгдэж байсан амжилттай. БНХАУ-ын АРДЫН ХЭВЛЭЛИЙН ХОРОО “Ногоон дэлхий” 18 цуврал номыг монгол бичгээр буулган хэвлэж, Өвөр монголын хүүхэд, багачууд уншигчдад хүрч, маш их алдаршсан. Удахгүй Швед Улсад номууд орчуулагдан хэвлэгдэхээр бэлтгэл ажил хийж байна. Монголын зохиолчдоос анх удаа харааны бэрхшээлтэй хүүхдүүдэд зориулаад “СОНИРХОЛТОЙ АМЬТАН УРГАМАЛ” номоо бриал үсгээр хэвлэсэн. Сүүлийн гурван жилийн хугацаанд нийслэлийн 50 гаруй сургуулийн 15000 гаруй сурагчидтай уулзалт, ном, уран бүтээлийн тухай ярилцлага хийж, хүүхдүүдийг урлаг, уран зохиолоор дамжуулж хөгжүүлэх ажлыг санаачлан хийж байна.

    Монгол ахуйн 99 хайку шүлэгтэй “ХӨХ ТЭНГЭРИЙН ДООР”, “ТЭНГЭР, ТЭНГИСИЙН ДУНД, “ЖИМБҮҮРИЙН ЭГШИГЛЭН” шүлгийн гурван ном нь Монголын хүүхдийн уран зохиолд шинэчлэл хийсэн бүтээл. Шүлэг, уран зураг, монгол бичиг, уран бичлэг гурвыг хослуулан бүтээснээрээ онцлогтой юм.