Хан-Уул дүүргийн наймдугаар хорооны нутаг дэвсгэр “Чингис хаан” олон улсын нисэх буудал хүртэлх замд 17 автомашин мөргөлдсөн осол гарсан. Ослын улмаас зургаан хүн эмнэлэгт хүргэгдсэн болохыг цагдаагийн байгууллагаас мэдэгдсэн. Тухайн үед нөхцөл байдал ямар байсан талаар ослын хохирогч Д.Баасанжаваас тодрууллаа.

   Тэрбээр “Өглөө хүүгээ “Чингис хаан” нисэх онгоцны буудал хүргэж өгөхөөр явж байгаад авто замын осолд орсон. Үзэгдэх орчин хязгаарлагдмал байсан учир зарим үед зогсчихмоор байсан. Хурдны зам дээр явж байгаа болохоор зогсож болохгүй шүү дээ. Тэгээд 10 км/цагийн хурдтай явж байгаад осолдсон машинуудтай тулчихсан. Би машин мөргөөгүй ч араас хоёр машин давхар мөргөчихсөн. Бас тормос гишгээд ч нэмэргүй гулгаа ихтэй байсан. Өмнөх машинаа мөргөөгүй тулдаа завсраар нь гараад явчихсан. Машины ар тал бага зэрэг эвдэрсэн ч хүмүүсийг онгоцноос нь  хоцроохгүйн тулд явчихсан. “МИАТ” ТӨХК-ийн хоёр машин осолдчихсон байсан болохоор зарим нислэг хойшилсон байна лээ. Зарим хүн гар өргөж, сүүлийн машинуудыг зогсоосон. Тэгэхгүй бол 17-оос олон машин мөргөлдөх байсан” гэв.