Засгийн газрын хуралдаанаас гарсан шийдвэрийг танилцуулж байна. Энэ үеэр Цахим хөгжил, харилцаа холбооны сайд Н.Учрал мэдээлэл өглөө.

Тэрбээр “2023 оны арванхоёрдугаар сард Ерөнхий сайдын захирамжаар эрүүл мэндийн салбарын цахимжилт эрчимжүүлэх ажлын хэсгийг байгуулсан. Эрүүл мэндийн яам, Цахим хөгжил харилцаа холбооны яам өнгөрсөн хугацаанд хамтарч ажиллаа. Үүний үр дүнд долоон системийг мэдээлэл солилцох боломжоор нь хангаж, иргэдэд танилцуулахад бэлэн боллоо. Өнөөдрийн байдлаар эмийн жорын мэдээлэл солилцох боломжийг хангаж и-монголиа систем дээр нэгтгэж орууллаа. Өнгөрсөн хугацаанд эмийн жорыг бичгээр бичдэг. Гаргац муутай бичсэнээс нь болоод буруу эм өгсөн тохиолдол гарч байсан. Цагдаагийн байгууллагат хуурамч эмийн жор үйлдэж, мансууруулах сэтгэцэд нөлөөлөх бодис авсан хэрэг бүртгэгдэж байна. Эрүүл мэндийн салбарт ажиллаж байгаа 30 гаруй мянган эмч, мэргэжилтнүүд өдөр тутамдаа 11 төрлийн  программ хангамж ашигладаг. Гэхдээ энэ нь хур системтэй холбогдоогүй байсан. Одоо бол мэдээлэл солилцох боломжийг нээсэн. И-монголиа системд эмийн жор харагддаг, эмч жор бичих боломжтой болсон. Энэ системд  тухайн иргэний нэг жилийн эмийн жор хадгалагдана. Эмийн гаж нөлөө болон хэрэглэх зааврыг оруулж өгсөн. Мөн дүрс оношилгоо дүгнэлтийг оруулж өгсөн. Иргэн  эмнэлгийн системд бүртгэгдсэн дүрс оношилгооны дүгнэлтийг өөрийн зөвшөөрлөөр бусад эмнэлэгт үзүүлж болно гэсэн. Шинжилгээний хариуг бодит, шуурхай авах боломжийг хангана. Хүүхдийн вакцин, эх хүүхдийн эрүүл мэндийн дэвтрийг цахимжуулна. Тавдугаар сарын 4-ний  өдөр долоон систем бүрэн нэвтэрнэ” гэв.