Нийслэлийн Сонгинохайрхан дүүрэгт угаартаж амиа алдсан 10 хүний талаар Цагдаагийн ерөнхий газраас мэдээлэл өглөө.

            Энэ үеэр цагдаагийн хошууч Д.Оюун "Цагдаагийн байгууллагад энэ оны гуравдугаар сарын 23-ны шөнө 03:00 цагт хүмүүс угаартсан байдалтай нас барсан гэх дуудлага мэдээлэл бүртгэгдсэн. Дуудлагын дагуу шалгахад, Сонгинохайрхан дүүргийн VI хороонд байрлах хаяг дээр 29-55 насны хүн угаартсан байдалтай нас барсан харамсалтай тохиолдол бүртгэгдсэн юм. Одоогийн байдлаар шалгалтын ажиллагаа үргэлжилж байна. Урьдчилсан байдлаар галлагаа хийсэн үедээ яндангийн хаалтыг бүрэн хаасан, утаа мэдрэгчгүй нөхцөл байдал тогтоогдсон. Иймд иргэд маань галлагаа хийгдэж байгаа үедээ яндангийн хаалтыг бүрэн хаахгүй байх, утаа мэдрэгчийг байршуулах, галлагаа хийж байгаа үедээ угаартахаас урьдчилан сэргийлэх, бусад аюулгүй байдлын заавар зөвлөгөөг дагахыг анхааруулж байна. Урьдчилсан байдлаар согтууруулах ундааны зүйл хэрэглэсэн байж болзошгүй нөхцөл байдал тогтоогдсон" гэв.