Дулааны улирал эхэлж байгаатай холбоотойгоор газрын хөрс, замын далангийн өнгөн хэсэг гэсэж, авто замд ус чийг хуримтлагдсаны улмаас замын ачаа даах чадвар, бат бэхийн үзүүлэлт огцом буурдаг. Тэгвэл үүнтэй холбогдуулан өнөөдөр буюу гуравдугаар сарын 20-ны өдрөөс ирэх сарын 20-ны өдөр хүртэл авто тээврийн хэрэгслийн байдалд тавих ерөнхий шаардлага буюу MNS 4598:2020 стандартад заасан автотээврийн хэрэгслийн бүх жингийн зөвшөөрөгдөх дээд хэмжээнээс хэтэрсэн задрах боломжгүй ачаа тээвэрлэлтийг зогсоож байна.

Энэ хугацаанд авто тээврийн хэрэгслийн байдалд тавих стандарт шаардлага зөрчсөнөөс үүдэн тээвэрлэлт саатсан хариуцлагыг тухайн аж ахуйн нэгж өөрсдөө хариуцах бөгөөд авто зам, замын байгууламжид үүссэн хохирлыг холбогдох хуулийн дагуу буруутай этгээд барагдуулах зохицуулалт үйлчлэх аж.