Тээврийн цагдаагийн албанаас замын хөдөлгөөний өөрчлөлтийн талаар мэдээлэл өглөө. Энэ үеэр Тээврийн цагдаагийн албаны дарга, хурандаа Б.Оюунтболд “Тээврийн цагдаагийн албанаас Чингисийн өргөн чөлөө, олимпын гудамжны замын хөдөлгөөний зорчих хэсэгтэй холбоотой иргэдээс гаргаж байгаа санал, шүүмжлэлтэй холбогдуулан үнэн зөв мэдээлэл Монгол Улсын замын хөдөлгөөний аюулгүй байдлын тухай хуулийн 8 дугаар зүйлд заасны дагуу цагдаагийн байгууллага замын хөдөлгөөний хэвийн үйл ажиллагаа аюулгүй байдал, аливаа эрсдэлээс урьдчилан сэргийлэх иргэдийг тайван байдлаар хөдөлгөөнд оролцоход нь дэмжлэг үзүүлэх, үүрэгтэй. Цагдаагийн байгууллагын зүгээс хуулиар хүлээсэн үүргийнхээ хүрээнд замын хөдөлгөөний ачааллыг тэнцвэржүүлэх зорилгоор замын хөдөлгөөний зарим урсгалд өөрчлөлт оруулсан. Энэ сарын 12-ны 17:50-19:20 минут хүртэл хугацаанд Чингисийн өргөн чөлөө буюу Төв шуудангийн уулзвараас 120 мянгатын уулзвар хүртэлх замын хөдөлгөөний хоёр эгнээг гурван эгнээ болгосон. Мөн Шангри-лагийн уулзавраас И-Мартын уулзвар хүртэл замын хөдөлгөөний ачааллыг тэнцвэржүүлэх зорилгоор эсрэг талын хөдөлгөөнийг сийрэгжүүлсэн. Чингисийн өргөн чөлөөн дээр хоёр километр, олимпын гудамж дээр 1.7 километр газарт тус зохицуулалтыг хийсэн. Өмнө нь зуслангийн бүс, уулын зам болон замын ачаалал их байдаг газруудад замын цагдаагийнхан өөрсдийнхөө үүргийн хүрээнд арга хэмжээ авч ажилладаг байсан. Өчигдөр замын хөдөлгөөний зохицуулалтыг өмнөх үеийнхтэй харьцуулахад эрс бага байсан” гэв.