Нийслэлийн хэмжээнд үүссэн халиа тошингийн нөхцөл байдал, хариу арга хэмжээ, шар усны үерийн аюулаас урьдчилан сэргийлэх чиглэлээр болон "Шар усны үерийн аюулаас урьдчилан сэргийлж, урьтаж хамгаалъя" аяны талаар мэдээлэл өгч байна. 

Нийслэлийн онцгой байдлын газрын Гамшгаас урьдчилан сэргийлэх хэлтсийн дарга, хурандаа Г.Нэргүй "Нийслэлд шар усны эсрдэлтэй нөхцөл байдал бий болсон. Хур тундас олон жилийн дунджаас 2-3 дахин нэмэгдсэн. Улсын онцгой комиссоос шар усны эрсдлийн нөхцөл байдалтай танилцсан талаар мэдээлж байна" гэлээ. 

Нийслэлийн онцгой комиссын нарийн бичгийн дарга, хурандаа Д.Оюунбат "Нийслэлийн дөрвөн дүүргийн 23 хорооны 33 байршилд халиа дошин үүссэн. Цаг агаарын төлөв байдал дулаарч байна. Улаанбаатар хотод олон жилийн дунджаас их хур тундас орж, гуу жалга орчмоор цасан хунгар бий болсон. Иймд шар усны эрсдэлтэй нөхцөл байдал үүссээд байна. Нийслэлд шар усны үнэлгээг гаргасан. Эрсдлийн үнэлгээгээр Сонгинохайрхан, Баянзүрх, Чингэлтэй, Сүхбаатар дүүрэгт эрсдэл өндөртэй, Багануур дүүрэгт их, Хан-Уул, Баянголд дунд, Багахангай Налайхад бага гэсэн үнэлгээ гараад байгаа юм. Үерт өртөх байдлаар авч үзэхэд 309 объект шар усны үерт өртөх эрсдэлтэй  гэж гарчээ" гэв.

 Нийслэлийн Газар зохион байгуулалтын албаны Кадастрын хэтсийн дарга Б.Загдсамбар "Өнөөдрийн байдлаар нийслэлийн төвийн дүүргүүдийн хэмжээнд 1339 айл халиа дошингийн эрсдэлд өртөх магадлалтай байна. Халиа дошингийн талбарт өртсөн 219 нэгж байна. Үүнээс долоон айл зөвшөөрөлгүй, 211 нь зөвшөөрөлтэй байгаа. Усны ундрага хаанаас ч гарч болзошгүй учир ийм эрсдэл үүсээд байна. Бид дараах айл өрхүүдэд шаардах болон тараах хуудас хүргүүлсэн. Үүнээс 60-аад айл нүүнэ, бусад нь нүүхгүй гэсэн. Онцгой байдлын газраас халиа дошинд өртсөн айлуудыг нүүлгэн шилжүүлэх ажлыг зохион байгуулах тал дээр анхаарч ажиллаж байна. Улмаар шинэ суурьшлын бүсүүдэд буулгах газар гаргаад байна. Баянзүрх дүүрэгт Хонхор буюу Радио телевизийн цахилгаан станцын зүүн талд 98 байршил, Цагаан даваа орчимд 57 айл Баянзүрх дүүрэгт 155 айлын байршил чөлөөлөөд байна. Сонгинохайрхан дүүрэгт 22-ын товчооны ард тал болон Ногоон толгод орчимд, Хан-Уул дүүрэгт 28 айл, Налайх дүүрэгт 20 айл нийт 348 айлын газарт нүүлгэн шилжүүлэх боломжтой болгоод байна" гэлээ.