Баян-Өлгий аймгийн Улаанхус сумын нэг, хоёрдугаар багийн “Монгол гол”, “Их-Ойгор” хэмээх газар уулын цас хайлж айл, өрхүүд шар усны үерт автсан тухай дуудлагыг өчигдөр 10:00 цагт хүлээн авсан байна. Тус аймгийн Онцгой комиссын Шуурхай штабын даргын шийдвэрээр Онцгой байдлын газрын Гал түймрийн улсын хяналтын байцаагч, хошууч Х.Ербуланаар ахлуулсан алба хаагчид мэргэжлийн ангийн хоёр хүн, орон нутгийн хоёр иргэнтэй хамтран 125 км замын туулан 15:15 цагт очиход дөрвөн айл шар усны үерт автах эрсдэлтэй байсан тул урьдчилан сэргийлэх зорилгоор 40 см өндөртэй, 150 метр урттай далан байгуулжээ.

     Мөн Өвөрхангай аймгийн Хужирт сумын Шивээт багийн 24 дүгээр гудамжинд уулын цас хайлж гурван айлын гэр хөрсний шар усны үерт автсан тухай дуудлагыг 03.12-ны өдрийн 15:15 цагт хүлээн авсан. Тус аймгийн Онцгой байдлын газрын Хужирт сум дахь Эрэн хайх, аврах бүлгийн алба хаагчид сумын мэргэжлийн ангийн долоон хүнтэй хамтран гурван км замыг туулан 15:24 цагт очиход иргэн Б, А, Э нарын нийт гурван айлын таван ханатай гэр хөрсний шар усанд автсан байсныг 04:34 минут ажиллаж аюулгүй газарт нүүлгэн шилжүүлсэн байна.