Монгол Улсад Үндэсний сэтгүүл зүй үүсэж хөгжсөний 111 жилийн ойн баяр өнөөдөр тохиож буй. Энэ үеэр “Өглөөний сонин”-ы Ерөнхий эрхлэгч Чанцалын Үл-Олдох сэтгүүлч Монголын сэтгүүлчдийн нэгдсэн эвлэлийн дээд шагнал болох Д.Бодоогийн нэрэмжит шагнал хүртлээ.

             Тэрбээр “Есдүгээр ангид Сүхбаатар аймгийн төвийн нэгдүгээр 10 жилийн сургуульд ирэхэд монгол хэл, уран зохиолын багш Ч.Сүрэнцэцэг, З.Надмидмаа, тухайн үед Монголын Зохиолчдын эвлэлийн Сүхбаатар аймаг дахь нэгдлийн эрхлэгч, аймгийн  монгол хэл, уран зохиолын заах аргын нэгдлийн эрхлэгчээр ажиллаж байсан, хүүхдийн нэрт зохиолч Навааншаравын Доржцэрэн багш нар маань сэтгүүлч мэргэжлийг сонгохо минь их нөлөөлсөн. Тэр үед  “Сүхбаатарын зам” сонины эрхлэгч, хариуцлагатай нарийн бичгийн даргаар ажиллаж байсан Ш.Бат-Өлзий, Ч.Цэнд-Арслан, зохиолч, сэтгүүлч Я.Түмэннаст, Г.Сүхээ, Ч.Дүүрэн, яруу найрагч Ц.Оюундэлгэр гэж олон хүн надад урам дэм өгч байв. Удалгүй хотоос “Үнэн” сонины  Сүхбаатар аймаг дахь тусгай сурвалжлагчаар зохиолч, сэтгүүлч, утга зохиол судлаач, шүүмжлэгч До.Цэнджав багш маань шилжин ирж, шүлэг бичдэг хүүхдүүдийг их дэмжиж байсан нь том нөлөө үзүүлсэн” гэж сэтгүүлч мэргэжлийн эзэн болоход үлгэрлэн дагуулж, нөлөөлсөн хүмүүсээ онцлон ярьсан байдаг.

             Ч.Үл-Олдох сэтгүүлч  “Улаанбаатар сонин”, “Өнөөдрийн Монгол”, “Нийгмийн толь”, “Зууны мэдээ” зэрэг өдөр тутмын сонины “гал тогоонд” ажиллаж, үе үеийн олон сэтгүүлчдээс суралцаж, хөгжиж ирсэн бөгөөд өнөөдөр "Өглөөний сонин" гэх том айлыг удирдан чиглүүлж яваа юм.