Шүүхийн ерөнхий зөвлөлөөс цаг үеийн асуудлаар мэдээлэл хийлээ. Энэ үеэр Шүүхийн Ерөнхий зөвлөлийн Хэргийн хөдөлгөөний удирдлагын хэлтсийн дарга Х.Билгүнзаяа “Хөгжлийн Банкны гэх тодотголтой хэргийн шүүх хуралдааныг гуравдугаар сарын 7-нд нийслэлийн Улаанбаатар чуулгын танхимд зохион байгуулна. Анхан шатны шүүх хуралдааныг хэргийн оролцогчдын тооноос хамаарч тухайн шүүхийн байранд хийх боломжгүй болсон. Энэ хүрээнд давж заалдах шатны шүүх хурлыг мөн адил Улаанбаатар чуулгын танхимд зохион байгуулахаар шүүхийн тамгын газраас шүүх хуралдааны бэлтгэл ажлыг хангаж байна. Мөн сэтгүүлч Н.Өнөрцэцэгтэй холбоотой хэрэг шүүхэд шилжиж ирээгүй байна. Хамгийн сүүлд Сүхбаатар дүүргийн Эрүүгийн хэргийн анхан шатны шүүхээс нэр бүхий өмгөөлөгч нарын хүсэлтээр Н.Өнөрцэцэгт авсан цагдан хорих, таслан сэргийлэх арга хэмжээг өөрчлүүлэхээр хэлэлцсэн. Тиймээс тус арга хэмжээг өөрчилж шийдвэрлэсэн байна. Одоо хэрэг мөрдөн шалгах ажиллагаанд үргэлжилж байгаа. Өөр сэтгүүлчийг цагдан хорьсон асуудал байхгүй” гэв.