Мэргэжлийн боксчин Э.Цэндбаатар “PROBOX” холбооны ээлжит тулаанаа хийлээ. Түүний мэргэжлийн дэвжээн дээрх ес дэх тулааны өрсөлдөгч нь гвиней гаралтай канад боксчин Мохамед Соумаоро байлаа.Тэдний тулаан АНУ-ын Флорида мужийн Плант Ситид "Уайтсандс" спортын ордонд болсон юм. Найман үе үргэлжилсэн тус тулааны эхний дөрвөн раундад хоёр боксчин тандсан тулаан хийж, Э.Цэндбаатар илт илүүрхлээ. Сүүлийн гурван үед манай тамирчин давуу байдлаа алдалгүй явсаар шүүгчийн саналаар ялалт байгуулав. Ингэснээр Э.Цэндбаатар мэргэжлийн боксод ес дараалан хожсон үзүүлэлттэй болж байна.

     Тэрбээр өөрийн цахим хуудастаа“Дэлхийн аварга болох зорилготой байгаа. Дөрөвдүгээр сард 59 кг-ийн жинд бүсийн төлөө тоглохоор болсон. Лайваар намайг дэмжсэн Монголынхоо ард түмэнд маш их баярлалаа. Тулааны үеэр гар бяцарсан. Үүнээс өөр бэртэл, гэмтэлгүй сайхан тоглолт боллоо. Америкчууд намайг “Сайхан тоглолт үзүүлсэн” хэмээн магтаж байна.  Миний дараагийн тоглолт бүсийн төлөөх тоглолт байх учраас маргааш бэлтгэлдээ орно. Боксоор хичээллэж байгаа дүү нартаа хэлэхэд, хүсэл, мөрөөдлийнхөө төлөө өдөр бүр бэлтгэл хий. Битгий шантраарай. Бүх тэмцээний аварга бол. Болдог л юм даа” гэв.