Бүгд Найрамдах Франц Улсын Засгийн газраас Үндэсний батлан хамгаалахын их сургуулийн Гадаад хэлний сургалтын төвийн багш Н.Уранчимэгт “Пальм академик-Эрдмийн далдуу мод” шагналын “Хүлэгт баатар” зэргийн одон гардуулжээ.

                             Тухайлбал, Монгол Улсын Зэвсэгт хүчинд мэргэжлийн өндөр ур чадвартай, үнэтэй боловсон хүчин бэлтгэх хүндтэй бөгөөд хариуцлагатай үйлсэд оруулсан хувь нэмрийг нь үнэлэн БНФУ-ын Засгийн газрын шагнал “Пальм академик” эрдмийн шагналын “Хүлэгт баатар” одонг Бүгд Найрамдах Франц Улсаас Монгол Улсад суугаа Онц бөгөөд Бүрэн эрхт Элчин сайд Сэбастиен Сүрүн болон Франц Улсын суурин бус цэргийн атташе, хошууч Амандин Крос нар гардуулан өгсөн байна. 

            Францын төрийн шагнал “Хүлэгт баатар” одон хүртсэн ҮБХИС-ийн Гадаад хэлний сургалтын төвийн багш Н.Уранчимэг “Энэ жил Монгол Улсад франц хэл заасны 60 жилийн ой тохиож байгаа. Ирэх жил Монгол Улс, Бүгд Найрамдах Франц Улстай дипломат харилцаа тогтоосны мөн 60 жилийн ой тохионо. Үүний хүрээнд франц хэлний багшийг төрийн дээд одонгоороо шагнасанд үнэхээр баяртай байна. Ташрамд хэлэхэд, ҮБХИС-ийн Гадаад хэлний сургалтын төв энэ жил 50 жилийн ойгоо тэмдэглэх юм. Тийм ч учраас энэ шагналаа хамт олон, сургууль, цаашлаад батлан хамгаалах салбартаа өгч байгаа бэлэг гэж харж байна” хэмээн баярын сэтгэгдлээ хуваалцжээ.

Үндэсний батлан хамгаалахын их сургуулийн Гадаад хэлний сургалтын төвийн багш Н.Уранчимэгийн хүртсэн “Хүлэгт баатар” одонг анх Францын эзэн хаан I Наполеоны санаачилгаар 1808 оноос олгож эхэлсэн бөгөөд Францын соёлыг хилийн чанадад түгээн дэлгэрүүлэхэд дорвитой хувь нэмэр оруулсан гадаадын иргэдэд олгодог нэр хүндтэй  шагнал юм байна.