Увс аймгийн Зүүнговь сумын сурагчид өвлийн улиралд бээлий болон гадуур хувцастайгаа хичээллэж байгаа талаарх мэдээлэл олон нийтийн сүлжээнд цацагдсан. Сурагчид хүйтэн ангид хэдэн жил хичээллэж байгаа, цаашид ямар арга хэмжээ авах талаар тус сургуулийн захирал Б.Анхбаяраас тодрууллаа.

     Тэрбээр “Манай сургууль 1952 онд баригдсан юм билээ. Хичээл ордог 10 ангитай. Сүүдэр талд хичээллэдэг дөрвөн анги бий. Манай сургууль 1996 онд шатаж, тоосгон хана үлдсэн гэдэг. Би 2017 оноос сургуульдаа ажиллаж байгаа. Тухайн үед сумынхан засвар хийж, өнөөдрийг хүртэл сурагчдыг  хичээллүүлж байна. Дээвэр, цонхны дууллага хийдэг ч хананаасаа дулаан алддаг учир хүүхдүүд өвлийн улиралд гадуур хувцастайгаа хичээллэдэг.  Сүүдэр талын дөрвөн ангид хичээллэдэг хүүхдүүдийг дотуур байранд болон сургуулиас бусад газар хичээллүүлж өвлийг авдаг. Өнгөрсөн жилийн хугацаанд манай сургуулийг шинэчлэх, засварлах тал дээр гишүүд огт анхаараагүй. Тиймээс өнөөдрийг хүртэл шинэ сургуультай болж чадаагүй байна. Бид шинэ сургууль барихад шаардлагатай бүх бичиг баримтыг бүрдүүлж, газар төлөвлөж, сургуулийнхаа зураг төслийг гаргасан ч улсын төсөвт оруулж чадаагүй байна. Саяхан УИХ-ын гишүүн О.Цогтгэрэл манай сургуулийн нөхцөл байдалтай танилцаж, чуулганы хуралдаанаар сургуулийн талаарх асуудлыг ярьж, төсөв шийдүүлж өгнө гэсэн” гэв.