Нийслэлийн нийтийн тээврийн зарим чиглэлд энэ сарын 1-нээс өөрчлөлт оруулсан. Улмаар сүүлийн өдрүүдэд хүйтний эрч чангарсантай холбоотой нийтийн тээврийн хүрэлцээ бага, ачаалал нэмэгдсэн талаар иргэд шүүмжилж байгаа юм. Тодруулбал, автобусны хүрэлцээгүй байдлаас шалтгаалж иргэд автобусанд багтахгүй олон цагаар гадаа зогсож байгаа юм. Энэ талаар бид иргэдээс тодруулга, мэдээлэл авлаа.

         ЕБС-ийн сурагч Б.Мөнхчимэг: -Хичээлдээ хоцрохгүйн тулд 06:30 гээд  гэрээсээ гардаг. Автобусны буудал дээр ирээд Ү:30 чиглэлийн буюу Жанжин клуб-Сүхбаатарын талбай хүрэх автобус хүлээгээд хамаг цаг өнгөрчихнө.

         Дор хаяж 30 минут хүлээж зогсдог. Гэхдээ сүүлийн хэдэн өдөр -40 хэм хүртэл хүйтэрсэн. Автобус ирэхгүй удаан хүлээснээс болоод чихээ хөлдөөчихсөн. Төвөөс ирж байгаа болохоор хүн цөөн байдаг ч удаан хүлээх нь хэцүү. Өглөө замын хөдөлгөөний ачаалал нэмэгдсэн. Энэ асуудлаас болоод автобус удаан хүлээж, багтахгүй хоцрох тохиолдол ч байна.

       ЕБС-ийн ахлах ангийн сурагч А.Анударь "М:5 чиглэлийн буюу Ботаникаас 10 хорооллын хооронд явдаг автобусыг 15 минут хүлээгээд зогсож байна. Говьхангай буудал дээр ирээд түгжирчихдэг. Ер нь Баруун дөрвөн замаас эхлээд түгжрэл эхэлчихнэ. Түгжрэл төв замаараа орой цагаар таг  болчихно. Автобус ирлээ гэж бодоход багтахгүй, шахалдах зэрэг хүндрэлтэй асуудал их байна. Өмнө нь Нарны замаар явдаг автобус бага, Улиастай-Дэнжийн-1000 буюу Ч:31 чиглэлийн автобус их байдаг байсан. Гэтэл саяны өөрчлөлтөөр Нарны замаар явдаг автобус нь их болоод Ч:31 дугаартай автобус нь бага болчихсон. Уртын чиглэлтэй автобусны тоог нэмэхгүй бол иргэд удаан хугацаанд автобус хүлээх нь их байна.

Иргэн М.Батцэцэг  “Ч:31 чиглэлийн автобус 20 минут хүлээж байна. Автобусны талаар олон асуудал байгаа. Наад зах нь автобуснууд  нэг бөөгнөрч ирээд 30-40 минут болоход нэг ч ирэхгүй байх жишээтэй. Автобус хоорондын зай  20 минут байвал сайн байна. Шинээр орж ирсэн автобуснууд дулаахан байгаа ч хүрэлцээгүй байдлаас шалтгаалж олноор зорчиж шахалддаг".

Оюутан "Автобусны аппликейшн хараад гардаг болохоор удаан хүлээгээд байдаггүй. Гэхдээ сүүлийн  гурван өдөр нэлээн хүйтэрч, таван минут зогсоход даарч байна. Тэгэхээр удаан хүлээж байгаа хүмүүс илүү даарч байгаа байх. Тиймээс эрэгтэй, эмэгтэй гэлтгүй дулаан хувцаслаарай"

Иргэн "Түгжрэл харьцангуй гайгүй байна. Ч:51 чиглэлийн автобус 30-40 минутын зайтай хэдхэн явдаг 45 минут хүлээд зогсож байна. Дүнжингараваас хороолол хүртэл ганцхан чиглэлтэй. Алхаад явъя гэхээр хөл муу. Хүйтэнд хол газар алхаж явах хүндрэлтэй. Автобусныхаа тоог нэмсэн гэж байгаа ч бодит байдал дээрээ иргэдэд төдийлөн үр дүнгээ өгөхгүй байна".

Иргэн “Баруун салааны Ч:41 дугаартай автобус хүлээж байна. Автобус 40-50 минут хүлээлгэж байна. Эмчилгээнээсээ хоцорчихлоо. Автобусны чиглэлийг хавар өөрчилсөн бол арай үр дүнтэй байж мэдэх юм. Эд хүйтний үеэр чиглэл өөрчлөгдөхөөр чиглэлээ ч мэдэхгүй, олон дамжиж суухад хүндэлтэй байна. Өмнө нь миний байнга зорчдог хэсэгт хоёр, гурван чиглэлийн автобус явдаг байсан. Гэтэл нэг автобус л явж байна. Үүнээс болоод ачаалал нэмэгдсэн" гэв.

Б.ХОНГОРЗУЛ