Шадар сайд С.Амарсайхан хаваржилтын нөхцөл байдлын талаар мэдээлэл хийж байна.

Тэрбээр “Хоёрдугаар сарын 15-наас эхлээд Засгийн газрын газрын шийдвэрээр улсын хэмжээнд өндөржүүлсэн бэлэн байдал буюу улбар шар түвшинд шилжин ажилласан. Хоёрдугаар сарын 15-наас тавдугаар сарын 15-ны өдөр хүртэл авч хэрэгжүүлэх арга хэмжээ холбогдох яам, засаг захиргааны байгууллагууд бэлэн байдалд 24 цагаар ажиллаж байгаа. Монгол Улсын 80 гаруй хувь цасан бүрхүүлтэй байна. Өнөөдрийн байдлаар 192 сумын өвөлжилтийн нөхцөл байдал хүндэрсэн байна. Үүний 23 суманд төмөр буюу шилэн зуд, 90 суманд цагаан зуд, 84 аймагт зудархуу нөхцөл байдалтай байна. Улсын нөөцөөс 6000 тонн тэжээл гаргаж өвөлжилт хүндэрсэн аймгийн малчдад хүргэж байна. Мөн орон нутгийн нөөцөөс 20 мянга гаруй тонн өвс, тэжээл нийлүүлэгдэж байгаа. Өвс тэжээл, шаардлагатай бараа материалыг малчдад хүргэх, цагийн нөхцөл байдлаас шалтгаалан нэмэлт арга хэмжээг үргэлжлүүлэн авна. УОК-ын даргын тушаалаар зургаан бүсэд Засгийн газрын гишүүд, сайд нараар ахлуулсан ажлын хэсгүүд ажиллаж байгаа. Зургаан бүсийг Эдийн засаг хөгжлийн сайд Ч.Хүрэлбаатар, Боловсрол шинжлэх ухааны сайд Л.Энх-Амгалан, УИХ-ын гишүүн Б.Жавхлан, ХХААХҮ-ийн сайд Х.Болорчулуун, Засгийн газрын хэрэг эрхлэх газрын дарга Д.Амарбаясгалан, Батлан хамгаалахын сайд Г.Сайханбаяр, Засгийн газрын гишүүн Б.Дэлгэрсайхан нар ажиллаж байна. Явуулын мал эмнэлэг сульдсан, доройтсон малын эмчлэх, шаардлагатай үйлчилгээг үзүүлэх болон халдварт өвчнөөс урьдчилан сэргийлэх арга хэмжээг авч байна. Малчдаас зээл, тусламжтай холбоотой хүсэлт олон ирсэн. Монгол Улсын хэмжээнд 190 гаруй мянган малчнаас 141 мянган малчин арилжааны банкнаас 1.2 их наяд төгрөгийн зээлтэй байна. Арилжааны банкнуудтай уулзаж зээлийн эргэн төлөлтийн зургадугаар сарын 1-ний өдөр хүртэл хойшлуулахаар болсон. Цас арилгах ажлыг бүх газраар явж хийнэ. Энэ чиглэлээр 480 гаруй машин гарч ажиллаж байгаа. Зам гаргахаар маргааш нь дахин шуурч  цасанд дарагдаж байна. Малчид маань үнэхээр хичээж байна. Хандив тусламжийг бүртгэж, шилэн дансаар тайлагнана.Өнөөдрийн байдлаар 1.5 сая гаруй мал хорогдсон байна. Үүнээс үүдсэн халдварт өвчин гаргахгүйн тулд ажиллаж байгаа” гэв.