Хөвсгөл аймгийн Улаан-Уул сумын ерөнхий боловсролын сургуулийн спорт зааланд хоёрдугаар сарын 15-нд 21:00 цагийн орчимд шатсан талаар бид мэдээлсэн.

Тэгвэл бид сургуулийн захиргаатай холбогдож, галын дүгнэлт гарсан эсэх, хэдий хэмжээний хохирол учирсан талаар тодрууллаа. Улаан-Уул сумын ерөнхий боловсролын сургуулийн захиргааны холбогдох мэрэгжилтэн "Сургуулийн спорт зааланд гарсан галын дүгнэлт хараахан ирээгүй байна. Юунаас болж гал алдсныг нь сайн мэдэхгүй. Мөн хохирлын хэмжээг тогтоогоогүй байна. Сургуулийн спорт заал 2003 онд ашиглалтад орсон. Ердийн галалгаатай байсан. Тухайн үед сургуулийн харуул ажлаа хийж байсан. Зааланд гал гарах үед дотор нь хүн байгаагүй. Суманд галын машин байхгүй учраас шатаж дуусах хүртэл нь хүн ойртож чадахгүй. Ингээд спорт заал бүрэн шатаж дууссаны дараа төрийн алба хаагчид, нутгийн иргэд ус цацаж, галын тархалтыг зогсоосон. Ойр орчимд нь байгаа барилга байшингуудад гал халдаачихгүй байх арга хэмжээг л авлаа. Спорт зааланд сургалтын хэрэглэгдэхүүн гээд байх их зүйл байгаагүй. Гарбөмбөг, сагсанбөмбөг, гар бөмбөгийн тор, шийд гэх ойр зуурын хичээлийн хэрэглэгдэхүүн л байсан. Манай сургууль шинэ байртай болох гэж байгаа. Сургуулийн шинэ байрыг 2024 оны дөрөвдүгээр сарын 15-нд ашиглалтад оруулна гээн урьдчилсан тооцоололтой байгаа. Сургуулийн шинэ байр 320 хүүхдийн багтаамжтай, шинэ спорт заалтай. Одоо хүүхдүүд спорт зааланд хичээллэх боломжгүй байгаа" гэлээ.