-МОНГОЛЧУУД МИК-ИЙН ЗЭЭЛЭЭР Л ОРОХ ОРОНТОЙ БОЛДОГ-

        МИК байгаагүй бол 90 мянга гаруй айл хаана, хэрхэн амьдрах байсан бол. Үнэндээ монголчууд МИК-ийн зээлээр л орох оронтой болдог гэхэд буруудахгүй. Харин өнгөрсөн долоо хоногт Шадар сайд С.Амарсайхан МИК-ийн тухай мэдээлэл хийж, МИК-ийг улс орон, ард иргэдийн мөнгийг баруун, солгойгүй луйварддаг тухай ярьсан нь бусдын анхаарлыг ихэд татаж байлаа. Тухайлбал түүний “Монголын ипотекийн корпорац иргэдийн зээлийн 2-3 хувийг луйвардаж авдаг” хэмээн ярьсныг МИК-ээс албан ёсоор “худал мэдээлэл” хэмээн залруулга гаргаж, монголчууд Шадар сайдад эргэлзэж эхэлсэн юм. Учир нь түүнийг ямар санаа зорилготойгоор МИК-ийн тухай худал мэдээлэл өгөв, МИК-ийг ингэж харлуулж гаргаж ирэхдээ улсад авах санаа агуулав уу хэмээн хардахад хүргэж байгаа юм. Хэрвээ МИК улсын нэг агентлаг болчихвол юу ч хийхгүй иргэд ч олноороо байранд орж чадахгүй гацчих нөхцөл өмнөх жишээнүүдтэй харьцуулахад тодорхой. Тиймээс олон айлыг гал голомтоо бадраах боломжоор хангасан Монголын ипотекийн корпорацыг улсын мэдэлд шилжүүлмээргүй байна, Шадар сайд, аа. 

        Засгийн газар Монгол банктай хамтран барилгын ажлыг дэмжих, гэр хорооллыг багасгах зорилгоор иргэдийг орон сууцжуулах хөтөлбөрийг 2013 оноос хэрэгжүүлж эхэлсэн. Тухайн үед ипотекийн зээлийн хүүг найман хувиар тогтоож байсан бол 2020 онд зургаан хувь болгож бууруулсан байдаг. Зээлийн хүү найман хувь байхад МИК компани 2-3 хувийн шимтгэл харин зургаан хувь болж буурахад орон сууцны зээлийн хүүгээс 1.6 хувийн шимтгэл авч байгаа тухай Шадар сайд С.Амарсайхан мэдээлсэн. 

     Мөн тэрбээр “Монгол банкнаас санхүүжилт нь гарч арилжааны банкуудаар дамжин иргэдэд хүрдэг уг хөтөлбөрөөс “Монголын Ипотекийн корпораци” зуучилсан гэдгээрээ иргэдийн сар бүр төлдөг зээлийн хүүгээс хувь авч байна. МИК дундаас нь хувь авдаггүй бол монголчууд ипотекийн найман хувийн зээлийг 5-6, одоогийн зургаан хувийн зээлийг таван хувиар авах боломжтой. Тиймээс холбогдох байгууллагууд хяналтаа сайжруулж, Монгол банк ипотекийн зээлийн хүүг бууруулах холбогдох хууль журмаа эргэн харж, өөрчлөх ёстой” гэсэн юм. 

 Харин Монгол банкныхан Шадар сайдын эсрэг байр сууриа илэрхийлж урт хугацааны зээл эрсдэлтэй учир эрсдэл хаах байгууллага байх ёстой. Тийм учраас энэ тогтолцоо хамгийн зөв шийдэл. Монголын ипотекийн корпорац нь Засгийн газраас хэрэгжүүлж буй хөнгөлөлттэй хүүтэй орон сууцны зээлийн хүүг худалдан авч, үнэт цаасжуулдаг гэдгийг онцолсон юм.  

-МИК ИПОТЕКИЙН ЗЭЭЛИЙН ХҮҮГЭЭС ШИМТГЭЛ АВДАГГҮЙ, ЗЭЭЛ ОЛГОХОД ОРОЛЦДОГГҮЙ-

       Монгол банк өнгөрсөн хугацаанд орон сууцжуулах хөтөлбөрийн хүрээнд 5.2 их наяд төгрөгийн зээлийг арилжааны банкуудад олгосон байна. Ипотекийн зээлийн санхүүжилтийг Монгол банк дөрвөн хувийн хүүтэй гаргадаг байсан. Харин одоо ипотекийн зээлийн нийт санхүүжилтийн 60 хувийг нэг хувийн хүүтэйгээр монгол банкнаас арилжааны банкуудад өгч байгаа юм. 

         Монголын ипотекийн корпорац зээл авсан иргэдэд зуучилсан нэрийдлээр хувь авч, луйварддаг тухай Шадар сайдын дээрх мэдээллийг үгүйсгэж, иргэдэд буруу ташаа мэдээлэл өгч болохгүй хэмээн МИК-ээс залруулга гаргасан. Тухайлбал, Монголын ипотекийн корпорац “Төрөөс хэрэгжүүлж буй орон сууцны хөтөлбөрийн хүрээнд иргэдэд олгох зээлийн хүүгийн шалгуур үзүүлэлтүүдийг Засгийн газар, Монгол банкнаас тогтоодог бөгөөд, эх үүсвэрийг Монголбанк арилжааны банкнуудад шууд олгож, банк-иргэний хооронд ипотекийн зээлийн гэрээ байгуулдаг. Зээл олгох үйл ажиллагаанд МИК огт оролцдоггүй бөгөөд зуучлагчийн үйлчилгээ үзүүлдэггүй, иргэдээс аливаа шимтгэл, хураамж авдаггүй” хэмээсэн байдаг. 

         МИК нь үнэт цаасны хоёрдогч зах зээлд үйл ажиллагаа явуулдаг мэргэшсэн санхүүгийн байгууллага. Монгол Улсын хүн амыг орон сууцаар хангах хөнгөлөлттэй хүүтэй ипотекийн зээлийн хөтөлбөрийг тасралтгүй хэрэгжүүлэхэд үнэт цаасны хоёрдогч зах зээлийн үйл ажиллаагаар дэмжин оролцдог. Өөрөөр хэлбэл, арилжааны банкны бие даан олгосон ипотекийн зээлийг тухайн банкнаас худалдан авдаг бөгөөд үүгээр ипотекийн зээлээр баталгаажсан бонд гаргадаг. Ингэснээр энэхүү хөтөлбөр 2013 онд хэрэгжиж эхэлсэн цагаас тасралтгүй үргэлжлэх боломжийг бүрдүүлж, үр дүнд нь 90 мянга гаруй айл өрх өөрийн орон сууцтай болсон байна.