“Монголдоо сайхан амьдаръя” уриатай залуусын жагсаал хоёр дахь өдрөө үргэлжилж байна. Үнийн өсөлтийг эсэргүүцсэн жагсагчдын төлөөлөлтэй өнөөдөр Ерөнхий сайд Л.Оюун-Эрдэнэ уулзаж, шаардлагыг нь хүлээж авсан. Улмаар жагсагчдын зүгээс тавьсан шаардлагын дагуу Засгийн газрыг яаралтай горимд ээлжит бусаар хуралдуулсан.

              Засгийн газрын ээлжит бус хуралдаанаас гарсан шийдвэрийг Ерөнхий сайд Л.Оюун-Эрдэнэ танилцуулах үеэрээ “Урт хугацаанд шийдвэрлэгдээгүй байгаа асуудлуудыг хуулийн дагуу шийдвэрлэх ёстой. Эдгээр асуудлыг  шийдвэрлэхэд Засгийн газар оролцох болно. Мөн аливаа шийдвэрийг гаргахдаа иргэдтэй ойр байж, санал хүсэлтийг нь хүлээн авна. Эдийн засгийн хувьд тусгаар тогтнолоо хангахад шийдвэрлэх ёстой олон асуудал байна. Үүнийг бүх нийтээрээ тэмцэж, хөгжлийг 30 жилийн түүхийг  бүтээх ёстой. Иймд Ерөнхий сайдынхаа хувьд та бүхнээс эвлэлдэн нэгдсэн шигээ, эв найрамдалтай жагсаалаа өндөрлөхийг хүсэж байна” гэлээ.