Эрүүл мэндийн сайд, Хөдөлмөр, нийгмийн хамгааллын сайдын 2021 оны А/758, А/197 дугаар тушаалаар шинэчлэн баталсан “Даатгуулагч (иргэн)-ийн хөдөлмөрийн чадвар алдалтыг тогтооход баримтлах өвчний жагсаалт, хөдөлмөрийн чадвар алдалтын хувь хэмжээ, хугацаа”-ны жагсаалтыг 2022 оны дөрөвдүгээр сарын 01-ний өдрөөс мөрдөж эхэлсэн.
Үүнтэй холбогдуулан эмнэлэг хөдөлмөрийн магадлалтай холбоотой хууль тогтоомж болон шинэчлэн баталсан өвчний жагсаалтыг хэрэгжүүлэх бэлтгэл ажлын хүрээнд Нийгмийн даатгалын хэлтсийн дэргэдэх Эмнэлэг хөдөлмөрийн магадлах комиссын гишүүд, нийт 200 гаруй эмч, мэргэжилтнийг хамруулсан сургалтыг 2022 оны гуравдугаар сард Баян-Өлгий, Дархан-Уул, Өмнөговь, Хэнтий аймгуудад бүсчлэн зохион байгуулсан.

   Харин энэ удаад Хөдөлмөр, нийгмийн хамгааллын яам, Эрүүл мэндийн яам, Нийгмийн даатгалын ерөнхий газар, Нийгмийн даатгалын ерөнхий газрын дэргэдэх Эмнэлэг хөдөлмөрийн магадлах төв комисс, Дэлхийн эрүүл мэндийн байгууллага хамтран хөдөлмөрийн чадвар алдалтыг тогтооход оролцож байгаа эрүүл мэндийн байгууллагын эмч нарыг чадавхжуулах, сургагч багш бэлтгэх сургалтыг 2022 оны дөрөвдүгээр сарын 07, 08-ны өдрүүдэд Улаанбаатар хотод зохион байгуулж байна.

    Уг сургалтад аймаг, дүүргийн Нийгмийн даатгалын хэлтсийн магадлагч эмч, салбар болон орон нутгийн Эмнэлэг хөдөлмөрийн магадлах комиссын гишүүд, эрүүл мэндийн байгууллагын Эмнэлэг хяналтын комиссын дарга, гишүүд, төрөлжсөн мэргэжлийн эмч, өрх, сумын эмч нар, нийт 170 орчим эмч, мэргэжилтнүүд оролцож байна. Сургалтаар Хөдөлмөр, нийгмийн хамгааллын яам, Эрүүл мэндийн яам, НДЕГ-ын дэргэдэх Эмнэлэг хөдөлмөрийн магадлах төв комисс, Эрүүл мэндийн яамны дотор, зүрх судас, дотоод шүүрэл, ревматологи, бөөр, цус, мэдрэл, сэтгэц, мэс засал, гэмтэл, согог, арьс судлалын болон сүрьеэгийн мэргэжлийн салбар зөвлөлийн мэргэшсэн эмч нар оролцож хичээл зааж, сургалтад оролцогчдод мэдээлэл өгөв.

   Энэхүү сургалт нь эмнэлэг хөдөлмөр, магадлалын талаар баримталж буй бодлого, эрх зүйн зохицуулалт тэр дундаа Эрүүл мэндийн сайд, Хөдөлмөр, нийгмийн хамгааллын сайдын 2021 оны А/758/А/197 дугаар хамтарсан тушаалыг хэрэгжүүлэхэд анхаарах асуудлын талаар эмч, мэргэжилтнүүдэд нэгдсэн ойлголт өгч, сургагч багш бэлтгэснээрээ иргэд, даатгуулагчдын хөдөлмөрийн чадвар алдалтын шалтгаан, хувь хэмжээ, хугацааг тогтоох, сунгах, цуцлах, ажлын цагийг богиносгох, хөдөлмөрийн нөхцөлийг солих магадлан шийдвэрлэх үйл ажиллагааг сайжруулахад чиглэж байгаагаараа ач холбогдолтой юм.