Үнийн өсөлтийг эсэргүүцсэн залуус Сүхбаатарын талбайд жагсаж байгаа. Өнгөрсөн шөнө жагсаалыг хүчээр тарааж, 64 иргэнийг баривчилсан мэдээлэл бий.

Тэгвэл энэ асуудлаар өмгөөлөгч Б.Пүрэвсүрэн Дэнжийн 1000-ын саатуулах байранд 20 гаруй залууг саатуулж, хууль зүйн туслалцаа авах эрхийг нь эдлүүлэхгүй байгаа талаар мэдээлэл өглөө. Тэрбээр

            “Дэнжийн 1000-ын саатуулах байранд 20 гаруй залууг саатуулж байгаа. Тэнд Монголын өмгөөлөгчдийн холбооны өмгөөлөгчид очсон. Үндсэн хуулиар олгогдсон хууль зүйн туслалцаа авах эрхийг нь эдлүүлэхгүй байна. Түр саатуулсан тохиолдол хуулиараа 24 цагаас хэтрэхгүй.

Ялангуяа насанд хүрээгүй хүүхэд байх юм бол эцэг, эх, асран хамгаалагч, өмгөөлөгчид нь мэдэгдэх ёстой. Дэнжийн 1000-д 20 гаруй залууг өмгөөлөхөөр өмгөөлөгчид очсон. Мэдүүлгээ аваад суллаж, явуулахад хууль зүйн хүрээнд ямар ч хүндрэл, бэрхшээл байхгүй. Юун хэрэг бүртгэл, мөрдөн шалгах ажиллагаа яриад байгаа юм.

            1994 оны Жагсаал, цуглаан хийх тухай хуулиар тухайн жагсаалыг албадан тараах бол Цагдаагийн газрын даргын тушаалаар бус, Засаг даргын тушаалаар албадан тараах ёстой. Цагдаа албаны тухай хуульд ч цагдаа нар хууль бус тушаалыг биелүүлэхгүй байх эрх бий.

Дэнжийн 1000-д сатуулагдаж байгаа залуусыг хоол, хүнсээр хангаж байгаа юу, ямар орчинд байлгаж байгаа, эрүүдэн шүүж байгаа эсэхэд талууд яагаад оролцохгүй, чимээгүй байгаад байгаа юм. Яагаад өмгөөлөгч өмгөөлөх хүнтэйгээ уулзаж болдохгүй юм” гэв.