Хотын дарга асан Э.Бат-Үүлийн Давж заалдах шатны шүүх хурал энэ сарын 4-нд болж, анхан шатны шүүхийн шийдвэрийг хүчингүй болгож, хэргийг нэмэлт мөрдөн байцаалтад буцаасан билээ. Улмаар Э.Бат-Үүлийг батлан даалтад гаргахаар шүүхээс шийдвэрлэсэн. Тэгвэл өнөөдөр АН-ын ээлжит бус Их хурал болж байгаатай холбоотойгоор Хотын дарга асан Э.Бат-Үүл мэдээлэл хийлээ.

            Тэрбээр “АН-ын анхдугаар Их хурлын төлөөлөгчдөдөө мэндчилгээ дэвшүүлье. Мөн намынхаа нийт гишүүдэд баяр мэндчилгээ дэвшүүлж байна. Би өнөө өглөө “Твиттер” хуудсаараа “АН-ын баатрууддаа баяр мэнд хүргэе” гэж жиргэсэн. 1990 онд Монголын хоёр дахь болон бүртгэгдэж, гарч ирсэн АН Монголын түүхэнд асар чухал үүрэг гүйцэтгэсэн. Зөвлөлтийн колоничлолоос гарах ажлыг АН-ын удирдлага дор хийсэн. Тиймээс манай АН-ын мянга мянган гишүүн бол Зөвлөлтийн колоничлолоос Монголыг чөлөөлсөн баатрууд.

Тэр цагаас хойш 32 жилийн дараа дахин сорилт тулгарлаа. ОХУ, Украины түрэмгийлэл бол ардчилалд зарласан дайн. Манай Монголд Зөвлөлтийн үеийн колоничлолын сэтгэлгээнээсээ салаагүй хүн олон байдаг нь В.Путины түрэмгийллийн үеэр их харагдлаа. Харин одоо бидэнд монголчуудын оюун ухаанаас колоничлолын сэтгэлгээг юу ч үгүй үлдэн хөөх асар их ажил байна. Ядахаа ОХУ, Украины дайн эдийн засгийн хувьд Монголыг элгээр нь хэвтүүлэхийг ч ойлгохгүй байна шүү дээ.

Бид энэ 32 жилийн турш гудамжинд ч гарч тэмцэж явлаа. Шоронд ч гэсэн ардчиллынхаа төлөө тэмцэнэ. АН-ынхаа залуу гишүүдэд “Үйл хэргийнхээ төлөө бид газрын гаваас ч гэсэн босдог ийм нам шүү” гэж хандаж хэлмээр байна” гэсэн юм.