Эрүүгийн цагдаагийн албанаас малын хулгай, цахим гэмт хэрэг, дээрэмдэх гэмт хэрэгтэй холбоотойгоор асуудлаар мэдээлэл хийлээ.

Мэдэгдлийн үеэр Эрүүгийн цагдаагийн албаны мэргэжилтэн “Улсын хэмжээнд 2022 оны I улирлын байдлаар дээрэмдэх гэмт хэрэг 174 бүртгэгдсэн нь өнгөрсөн оны мөн үетэй харьцуулахад 3.1 дахин өссөн.

Нийслэлийн Сонгинохайрхан дүүргийн 16 дугаар хорооны нутаг дэвсгэрт гуравдугаар сарын 27-ны өдрийн 23:50 цагт иргэн Д, Б нар согтууруулах ундааны зүйл хэтрүүлсэн хэрэглэсэн үедээ лифт дотор үл таних дөрвөн хүнд зодуулж, гар утсаа дээрэмдүүлсэн хэрэгт мөрдөн шалгах ажиллагаа явуулсан. Мөрдөн шалгах ажиллагаагаар тус хэргийн 14 настай Ч, 16 настай М, Б, 17 настай Н нар үйлдсэн болохыг тогтоож, дээрэмдсэн зүйлсийг нь хураан авч, холбогдох шалгалтыг ажиллагааг үргэлжлүүлж байна.

           Дээрэмдэх гэмт хэрэг үйлдэж байгаа этгээдүүд нь согтууруулах ундааны зүйл хэтрүүлэх хэрэглэсэн, охид, бүсгүйчүүдийг харанхуй болон гэрэлтүүлэггүй газар олзлон авч, биед нь хохирол учруулж байна. Дээрэмдэх гэмт хэрэгт ихэвчлэн өсвөр насны хүүхдүүд холбогдож байна. Иймд эцэг, эхчүүдийг өсвөр насны хүүхдээ ямар хүмүүстэй найзалж байгааг нь мэдэх, гэмт хэргийн эсрэг ухуулга, яриа хийж байхыг цагдаагийн байгууллагаас анхааруулж байна” гэв.