Эрүүгийн цагдаагийн албанаас малын хулгай, цахим гэмт хэрэг, дээрэмдэх гэмт хэрэгтэй холбоотойгоор асуудлаар мэдээлэл хийлээ.

Эрүүгийн цагдаагийн албаны Кибер гэмт хэрэгтэй тэмцэх хэлтсийн эрүүгийн мөрдөгч, цагдаагийн ахлах дэслэгч Г.Тэмүүлэн “2015-2021 онд хүүхдийн эсрэг гэмт хэрэг цахим орчинд 101 бүртгэгдсэн. 2022 оны эхний гурван сарын байдлаар хоёр холбогдогчтой есөн гэмт хэрэг бүртгэгдэж, мөрдөн шалгах ажиллагаа явуулж байна.

Цахим сүлжээнд гэмт этгээдүүд хуурамч хаяг үүсгэж, насанд хүрээгүй охидыг хууран мэхлэх, өөртөө дасгах, заналхийлэх замаар бэлгийн харьцаанд орох, хохирогчийг эрхшээлдээ оруулах, насанд хүрээгүй охидоор садар, самуун үйлдэл хийлгэх зэрэг гэмт хэргийн шинжтэй үйлдлүүд бүртгэгдэж байгаа. Энэ төрлийн гэмт хэргийн хохирогч болсон хүүхдүүд гэмт хэргийн хохирогч болсноо эцэг, эх, асран хамгаалагчдаа хэлдэггүй. Найз нөхдөдөө гадуурхагдах, гар утас, цахим орчны хэрэглээгээ хязгаарлуулахаас айсандаа гэмт хэргийн хохирогч болсноо нуун дарагдуулж байна.

              Монгол Улсын иргэн А нь 2020 онд цахим сүлжээнд хуурамч хаяг нээж, нийт 84 бага болон өсвөр насны охидтой танилцаж, харилцаа тогтоож, охидыг айлгах, ятгах, гуйх замаар өөрсдөөр нь нүцгэн дүрс бичлэгийг нь хийлгэн авч, улмаар нүцгэн дүрс бичлэгээр нь сүрдүүлж, айлган бэлгийн харьцаанд орсон гэмт хэргийг илрүүлэн шалгаж байна.

              Мөн бага насны охидыг хүчиндэх, бэлгийн хүслээ ёс бусаар хангасан хэргээр удаа дараа ял авсан этгээд цахим сүлжээнд шилжиж, бага насны хүүхдүүдийг садар, самуунд уруу татсан хэргийг илрүүлсэн” гэв.